Vawiin chawhnu khan Govt. J. Thankima College (GJTC) Hall-ah Finance Minister Pu Lalsawta’n Personality Development Course an kalpui mekah ‘ Goods and Services Tax, 2017’ tih thupui hmangin zirtirna a pe a. College zirtirtute lehkhabu buatsaih pahnih (2) a tlangzarh nghal a. Innovation and Best Practice Committee I&BPC (GJTC) chuan he hun hi an buatsaih a ni. 

Finance Minister Pu Lalsawta chuan Goods and Services Tax (GST) chu tunkum July Ni 1 atang khan India ram pumah hman tan anih thu sawiin GST chuan chhiah pek chungchangah bung thar min kaitir a ni, a ti a. GST chu indirect tax a ni a, sawrkar chhiah lak  niin kan thil leiah a tel nghal a ni, a ti a. Thil leitu tam tak hian kan thil leiah chhiah hi a tel nghal tih kan hrelo thin a ni tiin chhiah pek chungchangah mipui kan harhchhuah a tul a ni, a ti a. Zirlaite chu fuihin Mizoramah dinchhuah theihna a tam a mahse dingchhuak tur chuan tumruhna neih a ngai a ni, a ti a. Minister chuan a eng zawnga thil thlir thiam turin zirlaite chu a chah a. Ram hmasawnna chu thalaite kutah a innghat thuk hle a ni, a ti. 

Minister chuan zirlaite hnenah chuan chhiah pek dan chungchang, GST kalhmang leh chhiah khawn khawm hman dan thlengin a hrilhfiah a. GST-ah chuan chhiah lak nawn (multiple tax) a awm tawh lova, state leh central lak tur bithliah zat awmin GST chuan ram pawn atanga bungrua lakluh a tihtlem dawn a ni, a ti. 

Pu Lalsawta chuan ‘Economic Inequality and Development of North East India’ tih Dr JV Nunchunga ziak leh Pu Zoramthanga, Pi Maria Lalremruati leh Dr JV Nunchunga buatsaih ‘ Development Scenario  of Mizoram: A Multidimensional Approach’ a tlangzarh nghal a ni. 

Govt. J. Thankima College(GJTC) hi kum 1992-a din niin tun dinhmunah hian zirtirtu-28, Non teaching staff -15 leh zirlai 593 an awm mek a. Personality Development Course hi kum 2016 atang khan Rashtriya Uchchtar Shiksha Abhiyan (RUSA) Scheme hnuaiah kalpui niin zirlaiten nun tha leh thiamna chhawrtlak an neih theih nana hmalakna a ni. 

Govt. J. Thankima College Principal, Dr. C.Lalremruata chuan programme  kaihruaiin I&BPC Secretary Pu Zoramthanga chuan report a pe a. Dr. JV Nunchunga chuan lehkhabu tlangzarh tur thlirlawkna a nei a. Commisioner of State Taxes, Pu LH Rosanga atangin GST chungchang thusawina ngaihthlak a ni a. Lawmthu sawina in I&BPC Chairman, Pu Lalngaihawma’n programme a khar a ni.

Attachment

  • Loading attachment...