Finance Minister Pu Lalsawta chuan June ni 20, 2015 atang khan vawiin thlengin Mizoram sorkarin RBI atangin daily transaction-ah pawisa vawi khat mah a la puk leh lo a ni, tiin ram ei leh bar siamthat kawngah kalphung nghet tak lo awm tawh chu thlak danglam harsa viau thin mahse tumna a awm chuan hma a sawn zel theih thu a sawi. He thu hi vawiina Mizoram University Freshers' Social 2017, MZU Auditorium a khuallian nia a hmanpui naah a sawi a ni.
Minister chuan zirlai tharte chu an hma hun zela tha taka an zir theih nan a duhsakna hlan in, zirna kawngah leh hlawhtlinna kawngah mahni dinhmun atangin lungawilohna emaw harsatna hrang hrang nei theuh thei ni mah ila beidawng lova mahni inrintawkna nen taimak chhuah phawt zel tur a ni, tiin zirlaite fuihna thu a sawi a. Zirlaite hi ram hmachhuan an ni a, ram nuam leh ngaihsanawm a Mizoram chhuah thei turin a ram neitu kan mithiam thalaite bak hi an awm chuanglo a ni, a ti. Finance Mnister chuan tun atanga hun reilote ah degree tha tak tak nen graduate in, chumi hnu ah chuan eizawnna zawngin College-ah leh Sorkar Department-ah te an ngaihven hun a la awm ang a, mahse chung hmuna hnaruak awm zat chuan hnathawh tur zawng te a daih vek dawnloh avangin a aia hlawk thei zawk tur eizawnna ngaihtuah a ngaihven nachang hriat a pawimawh a ni, a ti a. Farming lam emaw, ranvulh lam emaw, themthiamna leh thildang dangah “entrepreneurial” rilru pu tak nen a hma lak chuan eizawnna engpawh nise tuna kalphung pangngai miin hma an lo lak mekna aiin a let tam taka a hlawk zawk tur thu a sawi a ni.
Vawiin Freshers' Social a khualzahawm Prof. Lianzela, Vice Chancellor, MZU chuan zirlaite hnenah zirna in sang rap thei a hmabak eng tak nei zirlaite chu lawmna thu sawiin, MZU zirlai an nih chhungin hun hlimawm tak leh hlawkthlak tak hmang tura a duh thu a sawi a. Chutihrual chuan zirna lamah theihtawp chhuah tel a, hlawhtling tum tak tak tura a duh thu leh, zirlaiten University dan leh inkaihruaina te hrechiang leh zawm tura a duh thu a sawi a ni.
He hunah hian Pu Lallungmuana, PUC chuan zirlaite hnenah an zirna leh nun kawng atan tangkai tur thu pawimawh tak tak a sawi bawk a ni.
Kum 2017 a MZU zirlai tharte lawmna programme hi Mizoram University Students' Council buatsaih niin, Academic Session kalta a exam neiha department hrang hranga gold medalist-te hnenah chawimawina hlan a ni a; Miss leh Mister thlanna neih a ni bawk.
