Government Mizo High School-in an school atanga High School Leaving Certificate (HSLC) Exam a hlawhtlinna chang te puala lawmna hun a buatsaih chu vawiin khan Finance Minister Pu Lalsawta’n khuallian niin a hmanpui.
Finance Minister chuan Goverment Mizo High School-in HSLC Result tha tak a nei thei chu zirtirtu leh zirlai te thawhrimna vang chauh a ni, a ti.. Mizoram-a harsatna lian tak pakhat chu hna thawk hreh kan tam vang a ni a, hnathawh zak lo ula, thawh tur awm apiang thawk hreh lo ang che u, Finance Minister chuan a ti. Minister chuan zirlai hlawhtlinna chang te chu Pathian malsawmna an dawn te chhawr tangkaiin duhtawk mai lova theihtawp chhuah zel tur leh thiamna zir zel a, tha ve satliah mai ni lovin tha ber nih tum theuh turin a chah a. Hlawhtlinna tun huna chang lo te pawh beidawng lova insiamthatna atana hmang zawk turin a fuih nghal a ni. Pu Lalsawta chuan zirlai kalkhawm te chu an zirlai hriat belh chakna neia zir thin tur leh hriatchianna a innghat tlat thin turin a chah bawk a ni. Zirlai hlawhtlinna chang thar te chu thinlung taka a lawmpui thu leh an kal zelna torah duhsakna a hlan a ni.
Kumin HSLC result chhuah tak ah khan Exam bei zawng zawng 259 atangin 248 (96%) in hlawhtlinna an chang a ni. Tun Academic Session kal mek ah hian zirlai 735 an nei a, heng zinga 310 te hi pawl 10 zirlai te an ni.
Result lawmna hun hi Pu Rammawia, Headmaster, Govt. Mizo High School- in a kaihruai a. He hun ah hian Govt Mizo High School atanga HSLC result puan taka pariatna dinhmun hauh tu Lalrinchhani d/o R. Laithuam chu lawmpuina pek a ni.
