Nimin tlai khan Pu Lalsawta, Minister, Finance, Planning & Programme Implementation etc. chuan Beraw tlang Tourist Complex panna kawng min hlauhthawn awm lai a tlawh a, hemi hnu hian Science center a tlawh nghal. Minister hi Pu K.S.Thanga, Parliamentary Secretary in a tawiawm a. Chief Scientific Officer Dr. Vanlalzara leh a thawhpui ten Science Centre ah hian lo dawngsawngin Exhibition House chhhunga Science zirtirna atana thil tangkai chi hrang hrang an neih te an lo kawhhmuh a. An hma chhawp te tarlangin an harsatna te Minister hnenah hian an thlen nghal a ni.
Finance Minister Pu Lalsawta chuan Science centre chu ennawm satliah a ni lovin science zirna pawimawh tak a ni a ti a. Sikul naupangte mai bakah science teacher te tan pawh science zirna a phurna pettu,thil thar ngaihtuah tir tu, technology thar leh khawl thar siam chhuah theihna idea an neih theihna atana zirna hmun tangkai tak a ni thei a ni a ti. Thiam bik nei si lova degree nei tam tak chherchhuah teuh ringawt hi mi beidawng tam tak siamna a ni thei a. Zirtirtu te pawh an zirlaite chherchhuah hna an thawhna kawngah rilru thar an put angai a ni tiin ram hmasawn nan result tha inneih siak ringawt a tawk tawh lo a ni a ti.Degree nei tihpun aiin mithiam chherchhuah theih a pawimawh zawk thu a sawi a. He centre pawh hi Aizawl khaw chhunga zirlaite chauh nilovin thlingtlang hmun hrang hranga zirtirtute leh zirlaite'n nasa zawkin tlawh tum se a hlawk dawn hle in a rinawm a ni a ti.
Exhibition House- forest leh fun science gallery awmna, Mini-Planetarium siamna tura ruahman inchhung te leh 3D theatre te endik a nih hnu hian Minister leh Parliamentary Secretary hovin Auditorium ah meeting tawi neih a ni leh a. He hun ah hian Scientici Officer Pu Aldrin Malsawmtluanga chuan Science Centre hmalakna hrang hrang te bakah an mamawh te tarlangin report tawi a pe a . Report a tarlan dan chuan Science centre, Berawtlang chu, May 2003 atang khan mipui tlawh theih a siam a ni a. He centre ah hian mipui leh zirlaite hiptu tur Forest Gallery, Fun Science Gallery, Musical fountain leh 3D theatre - 3D cinema en theihna te siam a ni a. Mini-Planetarium, kumin chhunga dah tuma hmalak mek pawh hi zirlaite leh mipui hipna atana tangkai tak a nih bei sei a ni. Heng hmun te hi nipui chhungin chawhma dar 10:00 atanga tlai dar 4:00 thleng leh thlasik laiin chawhma dar 10:00 atanga Chawhnu dar 3:30 thleng tlawh theih a ni a. Gate pass vantlang tan Rs. 10 leh zirlai form ha tan Rs.5 man te la hmasa in Forest gallery leh Fun Science Gallery te hi a tlawh theih a. 3D Cinema enduh tan chuan pawisa pek pelh a ngai a, vantlang tan Rs.20 leh zirlai form ha tan Rs.10 ah te bituk a ni.
May, 2003 atanga March, 2014 thleng khan Science Centre hian tlawhtu 2,57,024 atangin sum Rs.25,70,540/- a lalut tawh a. Heta sum hmuh te hi Sawrkar ah chhun luh vek a ni. Science centre tlawhtu zinga ah zirlai 41% chiah an awm a, exhibition house a thil dah hrang hrang te chu Science leh subject dang puihtu atanga tangkai tak tak a nih bawk si avangin zirlai ten nasa zawkin rawn tlawh thin se an duh thu Science centre a thawk te chuan an sawi a ni. 2012-2013 chhung khan science zirna kaihhnawih hmalakna hrang hrang 35 ah Science centre a thawkte hian an tha leh an hmanruate an thawh tawh a. Ram pum huap hmalakna National Science Day, Eyes on ISON, Awareness campaign, Seminar, symposium, workshop, training, quiz leh essay competion te a huaihawt tawh bawk a ni. An hma chhawp ah Naupang school chawlh laia an tuina bik a Science Hobby camp, Nature study camp, Regular science demonstration lecture leh zana arsi chanchin tlir paha zir te a dah a ni.
