‘Synergy for Energy in North East with Focus on Oil Exploration in Mizoram’ tih thupui hmanga Synergy for Energy - Challenges and Opportunities in North East (SECONE)-in Conference a buatsaih chu vawiin chawhma dar 10:00 khan ATI Auditorium ah Finance Minister Pu H.Liansailova’n a hawng.
Conference hawnna thu sawiin Minister chuan Mizorama tuialhthei zawn mek a nih laia Mizoram thlurbinga conference buatsaih a ni chu lawmawm a tih thu a sawi a. Energy chu ram hmasawn nana thil tul hmasa leh pawimawh ber a ni a, chutiang remchanna thahnem tak Mizoramin a neih laiin duhthusam anga haichhuah a la ni lo erawh chu tan lak a tul hlea a ngaih thu a sawi. Leilung hausakna namenlo haichhuah theih nei reng chunga state hnufum tak kan la nihna chhan chu rampum huap hmasawnna Plan 7-na kha Mizoramin a zawm ve theih chauh vang a ni, a ti. Vawiina Seminar huaihawt chu Mizoramin a hlawkpui ngei a beisei thu a tarlang bawk. Tuialhthei zawnchhuah kawnga thawktute tanpui leh an hmakhua ngaihsak turin Mizoram Sorkar a inhawng reng a ni a ti bawk.
Khualzahawm Parliamentary Secretary Pu H.Zothangliana pawhin thusawiin Seminar chuan Zoram mipui te rilru-ah tuialhthei zawnchhuah leh hlutna te a tuh thar a beisei thu leh Mizoram chu rampum huap energy map ah telh ve thuai a nih a beisei thu a sawi bawk.
Industries Principal Secretary Pu P.C.Lallawmsanga pawhin thusawiin energy chu mihring te tana a lova awm theih loh, damkhawchhuahna hnuk pawimawh ber a nih avangin a renchem kawngah te, siamthar chhuah zel kawngah te tun aia nasaa tan lak a tul a ni, a ti a. Tui leh boruak alh thei Mizorama zawnchhuah hnathawh mek hian state pum ram hmun 58.9 % a khuh a ni, a ti. Indian ram thang zelin energy a mamawh tam zel dawn avangin he hna kalpui mek pawh hi chak leh zuala bawhzui tul a tih thu Seminar chhimtu te chu a hrilh bawk.
SECONE Chairman Dr P.K.Choudhury leh Oil India Ltd. leh ONGC palai lo kal ten thu an sawi bawk. SECONE hi India hmarchhaka energy haichhuak tura pawl inzawmkhawm Society-a 2009-a din a ni a. Vawiin Conference hi India oil map-a Mizoram khung ve tura Mizoram State Sorkar, Oil company te, tuialhthei zawnchhuah hna thawktu hrang hrang te, DGH, University mithiam leh zirlaite inrawnkhawmna leh hmalakhona tura huaihawt a ni a, chawhnu lamah tui leh boruak alh thei zawnchhuah chungchangah mithiam hrang hrang te buatsaih paper zirho a ni.
