Vawiin khan Finance Minister Pu H.Liansailova chuan kum 2012-2013 atana Budget ruahman leh Supplementary Demand for Grants 2011-2012 chu House-ah a pharh a. Planning Commission of India-in State Sawrkara sum pek tur a la tihfel loh avangin Plan fund bikah chuan kum kallaia Plan Fund neih zat cheng vaibelchhe 1700 angin department hrang hrangah sem phawt a ni a, chu chu thla li (April – July, 2012) chhunga lo hman tur chauh ‘Vote on Account’ hmangin tun hunah hian pharh a ni.

Budget (Annual Financial Statement) pharh taka a lan dan chuan kumthar (2012-2013) chhunga sum hmuh tura ruahman chu cheng vaibelchhe 22743.09 niin sum hman tura ruahman chu cheng vaibelchhe 22296.05 a ni a, kum tawp ah sum hman bang cheng vaibelchhe 447.05 awm tura chhut a ni. Sum hman tura ruahman atang hian thla li chhung (April – July, 2012)-a sum hman lailawk tur tun huna pharh zawng zawng hi cheng vaibelchhe 1663.12 a ni a. Revenue Account hnuaiah cheng vaibelchhe 1390.83 leh Capital Account hnuaiah cheng vaibelchhe 272.28 hman tura ruahman a ni.

Kum kallai meka sum indaihlohna te, Plan fund siam danglam avang leh Central lam atanga sum hmuh tlai vanga House thutkhawm hmasaka pharh hman loh sum dil belhna ‘Supplementary Demand for Grants 2011-2013’ pawh pharh nghal a ni a. Supplementary Demand for Grants hmanga sum dil belh hi a vaiin cheng vaibelchhe 783.33 a ni a. Hetah hian Non-Plan hnuaia sum dil belh chu cheng vaibelchhe 207.23, Plan hnuaiah cheng vaibelchhe 84.23 leh CSS/NEA/NLCPR hnuaiah cheng vaibelchhe 216.45 a ni. Kumin (2011-2012) kum kallai kumtawpa sum indaihlohna cheng vaibelchhe 30.75 ni tura chhut (Budget Estimate) chu, kum tawpah chuan sum hman bang cheng vaibelchhe 279.78 lai awm zawk tura chhut a ni.