Vawiin chawhnu khan Finance Minister Pu Lalsawta  chuan Tanhrilah Central Jail a tlawh a; hetah hian Central Jail enkawltute  nen  Tan In hung chhunga hmun hrang hrang te fangkualin an endik a ni. 

Finance Minister Pu Lalsawta chuan Central Jail chu a chhunga dinhmun leh mamawhte a hmun ngeiah hriatchian tum a tlawh a ni tih sawiin Central Jail Superintendant Office-ah Prison Official te nen inkawmna  hun an nei a. He hunah hian  tun dinhmuna mamawh zual deuh bik nia lang te chu Central Jail enkawltute nen sawihona neiin sawrkar tana thil tul zual  tih theih awm te pawh an ngaihtuah tlang nghal a ni. Finance Minister hi Finance Principal Secretary Pu Lalnunmawia Chuaungo, Home Additional Secretary Pu Lalbiakzama leh IG(Prison) Pu Sangthuama ten an zui a; Central Jail-ah hian DIG(Prison) Pu Lalthankima Sailo leh Central Jail Special Superintendent Pu Lalrosanga Chhangte bakah Medical Officer  Dr Lalhriatzuali Ralte leh official dang ten an lo dawngsawng a ni. 

Central Jail-ah hian staff 136 awm turah 114 an awm mek a; jail tang 536 awm theihna turah jail tang 638 an awm mek bawk a ni. Tang zingah hian hmeichhia, nausen pawmlai 4 tiamin 61 an awm mek a, a dang 577 te chu mipa an ni thung. Tang zinga tam ber 292 te chu Under Trial Prisioner(UTP) an ni a, a bak chu Lifer 33, R.I. Convict 129 leh S.I. Convict 136 te an ni.

 

Attachment

  • Loading attachment...