Vawiin khan Finance Minister Pu Lalsawta chuan ‘Fresh Vegetables Show’ Sairang a neih a hawng.

Pu Lalsawta chuan Sairang mipuite thawhrimna chu fakin, an mahni tharchhuah ngei hmanga thlai thar pho chhuah runpui an nei thei chu entawntlak tak a ni a ti a. Sawrkar hmalakna in tam zawk tharchhuah, dahthatna siam leh thawnchhuah tur a ruahmanna siam tum a nih thu a sawi a. Sairang khaw mipuite, Nul Association leh Horticulture Dept.te thawhhona chu fakawm a tiin, tha taka an thawhho zel theih nan duhsakna a hlan nghal bawk a ni.

He Fresh Vegetables Show hi Pu Vanrammawia, Organising chairman chuan a kaihruaia, Pu Rosanglura Ralte, DHO, Aizawl in inlawmna thu a sawi a. Report tawi Pi J.Lalthianghlimi, Organizing Secretary hnen atanga ngaihthlak a ni. Programme te hman zawh anih hnuah Lawngleng hmangin Nul huante fanna Minister chuan a nei bawk a ni.

Sairang ah hian kum 1959 vel atang tawh khan nul siam tan a ni a. Tun dinhmunah Nul Huan Association (NHA) hnuaiah member 360 an awm a. He hunah hian nul atanga thlai thar te chu mipuite hnenah tlawm zawkin hralhchhuah a ni. He ‘Thlai thar phochhuahna hun’ hi naktuk lamah pawh chhunzawm tur a ruahman a ni.