Vawiin khan Finance Minister Pu Lalsawta chuan Junior Engineer Service Association of Mizoram (JESAM), Conference vawi-2 na Tourist Lodge Chaltlang-ah a hmanpui.

Finance Minister chuan JESAM chu pawl lian tak, a member te pawh department hrang hrang ami, an awmna department theuh a hmunhma chenchilhtu an nih thute sawiin department hmasawnna atana Junior Engineer (JE) te pawimawhna a tarlang. Junior Engineer te chu sawrkar hnathawk dangte ang thovin an chungah sawrkar in beiseina sang tak a neih thu hrilh in an awmna apiangah thahnem ngai taka thawkzel turin a chah a. JESAM in harsatna a neih te chu sawrkarin a tul anga a enfiah sak tur thu a sawi.

Minister Pu Lalsawta chuan NEDP tobul leh hmachhawpte tarlangin NEDP chu Mizo te nun ngaireng, eichawp ngawr ngawr leh mamawh tawk chauh tharchhuah kalsanna tur bakah tamzawk tharchhuah theihna tura duan a ni a ti a. Beneficiary ngawr ngawr lam hawi lovin Market Economy lam tinzawnna anih thu te, hemi atan hian mi titaktak leh dinchhuah duhtute tana sawrkarin kawng a siamsakna a nih thu a tarlang a. Minister chuan NEDP chu a mizo tawng takin ‘Tang puihna’ , tanna chang hria leh mi tumruhte puih na tur anih thu sawiin NEDP nihphung a sawifiah.

JESAM Conference hi an President Pu JK Duailova’n a kaihruaia, Gen Secy Pu Lalthanliana’n report pe in tun dinhmunah JESAM ah hian Members 571-an awm mek a ni. He hunah hian pawl hmalakna leh inrelbawlna chungchang te sawihona neih a ni a. Member kaisang te lawmpuina leh pension te thlahna hun pawh hman tel nghal a ni.