Vawiin chhunah khan Pi Renu Sharma IAS, Secretary i/c GAD, Finance, Planning, chuan Lawngtlai DC Office tlawhin thawktute a kawm a. He hun hi Lawngtlai DC Conference Hall-ah hman niin Pu B. Lalhmingthanga, DC, Lawngtlai chuan Pi Renu Sharma lawmna thu a sawi a ni.

He inkawmna hunah hian Lawngtlai DC Office mamawh hrang hrang bakah District chhunga hmasawnna hna hrang hrang thawh a nih dan te, District chhunga administrative post pawimawh ruak mek a rang thei anga hnawh khah dan tur te, Sorkar hmalakna dinhmun, harsatna tawn mek te leh chinfel dan kawng zawn dan tur te sawi ho a ni a. NLUP hnuaia line department hmalakna te, Socio-Economic Caste Census thlen chin te, Public Grievance Redressal Mechanism inbun fel tawh dan chin te, Fair Price Shop leh ration card chungchang te, Multimodal Transport Project chungchang leh District inrelbawlna (administration) chungchangte ngun takin an sawi ho a ni bawk.

Pi Renu Sharma chuan Sorkar hmalaknaah ngaihpawimawh tur thliar fel a tul thu leh hna thawh zawh hun tur bituk a pawimawh thu a sawi a. Socio-Economic Caste Census hnuaia Charge Office tinah NIC leh ICT te hmang tangkaia internet hman theiha siam tum hram turin a chah a. NLUP beneficiary te hna thawh dan leh an trade chungchang te hriat chian tum leh zual turin officer te a ngen bawk a. Pi Renu Sharma chuan DC Office zawng zawng tlawh vek a tum thu sawiin office mamawh te GAD ah rang taka thlen turin a hrilh a. A tak taka hna thawh dan dinhmun en leh hnathawktute harsatna ngaihthla theia a awm chu lawmawm a ti tih a sawi bawk.

Pi Renu Sharma hian Lawngtlai DC Office bakah Lawngtlai Dstrict Computer Center te, Lawngtlai CIrcuit House te, Chawnhu-a DC Staff quarters leh Lai Autonomous District Council Office te a tlawh bawk a ni.