State Level Committee on Fire Prevention leh Env. & Forests Deptt. te’n ramkang leh kangmei dang vën chungchanga hma an lâkna chu Zoram hmun hrang hrang- State Level, District Level, Forest Division Level, Forest Range Level-te bakah khaw mal huap pawhin hman mek a ni a. Hmun thenkhatah chuan YMA khawmpui neihnaah hun hman a niin awareness campaign neih mek zel a ni a. Chumi hma lakna kal zelah Fire Prevention Awareness Campaign chu 28.02.2013 (Thu) chawhma dar 11:00 khan Vanapa Hall-ah hman a ni a, Pu H. Rohluna, hon’ble Minister, Env. & Forests Deptt.-in khuallian niin a hmanpui a ni.
Khuallian chuan, “Kan rama mipui tam zawk hi tlang ram Lo neiha eizawng kan la nih rih avangin Lo hi kan hal lo thei lova, Lo neitute kan dem ngawr ngawr vang ni lovin Lo hal avanga kan vah bak ram kang thin hian kan ramngaw tihchhiat nasat tawh em avangin ram tikang lo tura kan fimkhur a, kan ven a pawimawh a, meilam tha taka sialin khaw awm dan azirin mei lu khaia Lo hal emaw, thli awm dan azira Lo kan hal thin a pawimawh a ni,” a ti. “Kangmei ven hi sawi tam viau tawh mah ila kan Lo neih danin azir miau loh avangin kan sawi tam lua thei lo. Hemi veng tur hian state level, district level bakah sub-committee-te din a hmalak anih thu sawiin staff indaih lohna avang leh sum leh pai lama harsatna avangin duh ang thalin hmalak a harsat thu a sawi bawk. Heng kan Lo neih dan thlak nan hian Japan International Co-operation Agency (JICA) leh Green Indian Mission (GIM)-te atangin sum thahnem tham tak hmuh beisei chu hman tum anih bakah eco-tourism atan hman tum a ni. Khaw hrang hrangah ramngaw humhalh nan supply reserve, safety reserve, YMA reserve neite chawhphur nan hman tum a ni bawk. Christian kan nih angin Pathian thil siam dangte chunga chanchin tha hril tur kan ni tiin kan ramah mihring kan la tlem hle nachungin ramngaw tha, Chhura rual han tih tur kan nei tlem hle mai hi tan kan lak thar a ngai a ni tiin he huna zirtirtu lo telte chu ramngaw nungcha humhalha kangmei laka venhim a pawimawhzia an naupangte theuh lo zirtir turin a chah bakah kan rilru sukthlek kan siam that chuan kan tu leh fate tan ram nuam kan siam thei dawn a ni,” a ti bawk.
He hunah hian Pu Vanneihtluanga leh Pu Vanlalruata, Gen. Secretary, CYMA ten thusawina hun an hmang bawk.
He hunah hian Govt. T. Romana College, Aizawl Law College, St. Paul’s HSS, Home Missions School zirlaite leh tlawmngai pawl- YMA, MUP, MHIP-te bakah environmental NGOs- BIOCONE, ASEP, SENVA, CEP-te an tel a, Vanapa Hall-a leng lo khawp mipui an kal khawm a ni. Zaithiam zai leh lemchan tawi te an ngaithla in an en bawk a ni.
Tun tuma Fire Prevention Awareness Campaign hi PCCF & Member Secretary, State Level Committee on Fire Prevention, Pu J.L Singh, IFS chuan kaihruaiin, Pu Liankima Lailung, Conservator of Forest, Wildlife-in lawmthu sawiin he hun hi a khar a ni.
