No.135/2021-2022

Aizawl, the 14th April, 2021: Fire Service Day/ Martyrs Day pualin Fire & Emergency Services Headquarters, Aizawlah tukin zing dar 7 khan programme neih a ni a. Aizawl pawn lama Fire Station te pawhin vawiin ni vek hian chawhma dar 9 ah hun an hmang.

Kum tinin Fire Service Week hi India ram pumah April 14 atanga April 20 chhungin hman thin a ni a, April 14 hi Fire Service Day/ Martyrs Day bik atan hman a ni. Kumin 2021 Fire Service Week thupui atan hian India Sawrkar chuan “Kangmei chhuah thulhah kangthelhna hmanrua nena lo inralrin lawk hi kan himna a ni” tih chu a thlang a ni.

Kumin hian Mizoram sawrkar ruahmanna angin Department/Office hrang hrangah he Fire Service Week puala thuchah chhiar chhuah a ni a. Hei bakah hian Bookmark siamin Fire Station te Telephone number tarlan a ni a. All India Radio, Aizawl atangin he Week pual hian thuchah leh Discussion te tih chhuah a ni bawk. 17.4.2021(Inrinni) zingah hian he Week pual hian Cycle Rally buatsaih a ni dawn bawk a. He Week puala High School naupang tana Essay Writing Competition buatsaih lawmman chu Week khar ni, 20.4.2021(Thawhlehni) hian neih a ni bawk ang. Vawiin Martarte sunna hunah hian nikum 2020 chhunga India rama kangthelhnaa thi mi 11(sawm pakhat) te hming chhiar chhuakin anmahni sun nan Minute khat ngawi renga dingin hun hman a ni a.

Kum 1944, April ni 14 khan Indo lawng lian ‘Fort Stikine’ chu Mumbai lawng chawlh hmunah a kang vak a. He kangmei chhuak rapthlak takah hian Bombay Fire Brigade mi 66 leh Bombay Salvage Corps mi 11 kangthelh tute chuan an nunna an chan phah a ni. Heng mitthi te hriatrengna atan hian Fire Service Day hi April 14 ah hian hman a ni ta a. April 14th -20th chhung hi Fire Service Week atan India ram pumah hman thin a ni. He week chhung hian India rama Fire Service chi hrang hrang te chuan kangmei laka himna tur zirtirna an nei thin a ni.