Nikum May 11, 2013 zinga Laipuitlanga leimin chhiatna rapthlak taka chhanchhuah hna thawktu Fireman pathum te - Pu C.Lalawmpuia, Pu Lalnghahmawia leh Pu B.Vanlalruattluanga ten India Sorkar atanga huaisen chawimawina Fire Service Medal for Gallantry an dawn, kumin Republic Day-a hlan tak te lawmpuina hun chu vawiin tlai dar 2:00 khan Fire & Emergency Services Headquarters Office, Hunthar Vengah hman a ni a, Home Minister Pu R.Lalzirliana leh Parliamentary Secretary Lt.Col.(Rtd) Z.S.Zuala ten an hmanpui.
Chhiatna thlen thu an hriat ve leh heng Fireman pathum te hian a hmun an pan nghal a, electric eng awm lo leh ruah sur hnuaiah, mahni nunna hial pawh chan huamin chhanchhuah hna an thawk nghal a, in chim kara tang Pi Nambarliani, kum 61 chu dam takin an la chhuak thei ta a ni. Hetianga mahni nunna pawh chan huama mi dangte chhanchhuak tura an inpekna hi India Sorkar chuan a ngaihluin chhuanawm a ti a, chuvangin huaisen chawimawina sang “Fire Service Medal for Gallantry’ hi a hlan ta a ni.
Home Minister chuan lawmpuina thu sawiin ram pum hriata huaisen chawimawina dawng thei an inchherchhuak thei chu ropui leh chhuanawm a tih thu a tarlang a. Award dawngtu Fireman pathum te chu an hmingthatna chhawm nung zel tur leh khawtlang tana mi entawntlak ni chhunzawm zel turin a chah. Tanpui ngai leh chanhai te chhanchhuah hna chu Fire & Emerency Services thupui a ni tiin Minister chuan Department-a thawktu te chu thahnemngai taka thawk chhunzawm zelturina fuih bawk. Misual ten an rukbo Deep Mondal zawng tura mi thenkhatin hun tiam siama vah chhuah an tum chungchang sawiin Minister chuan mahni inlum atanga inhrosaa lemchan nun Zofa ten kan pawchhuak tan chu pawi a tih thu a sawi a, ram pawn Bangladesh ah an tawmpui tih hriain Sorkar chuan chhanchhuak turin theihtawp a chhuah reng a ni tih hriaa, Sorkar hmalakna ngaichang thiam hram turin mitin a ngen bawk.
Parliamentary Secretary Lt.Col.(Rtd) Z.S.Zuala chuan huaisenna chawimawina dawngtu te chuan an phu a ni tiin an department tanrualna rah a nih thu a sawi lang a. Chutiang chawimawina chu hnam ropui apiangin an ngaihhlut thu a sawifiah bawk. F&ES Department thawktu te chuan an hnathawhna kawngah hmahruaitu nih an tlin hle-a a hriat thu sawiin an hmanraw changkang tak tak neih ai maha a thawktu mihring an pawimawh zawk thu te a tarlang a, Department naupang te-in ram pum huap chawimawina dawng thei khawpa mi chhuanawm an chhuah thei chu a lawmpui thu a sawi lang bawk.
Gallantry Award lawmpuina inkhawm hi F&ES Director Pu C.Laldina’n a kaihruai a, hetiang Fire Service Medal for Gallantry hi Mizoram-in a dawn hmasak ber a nih thu sawiin Department hmachhawp hrang hrang te a tarlang bawk. He hun hi IGP Pu Zorammawia leh Jt. Secretary, Home Pu Biakzama ten an hmanpui bawk a ni.
