Vawiin tlaiah khan Mizoram Finance Commission hmasa ber, 1st MFC chuan an Report buatsaih, bung 12 thenhran leh phek 362 a chhah chu Mizoram Governor Dr. Aziz Qureshi hnenah an thehlut. He Report hi Mizoram Sawrkarin a zir chian hnuah bawhzui a nih dan (Action Taken Report) te siamin Mizoram Legislative Assembly ah pharh a la ni ang a. Chumi hnu-ah mipui nawlpui hmaah la tlangzarh- chauh tur a ni ang.

Mizoram Finance Commission hi Mizoram Finance Commission Act, 2010 hnuaiah 30th September, 2011 ah part time Chairman Pu Van Hela Pachuau leh Member Secretary Pu Lalthansanga neiin din a ni a. Chumi hnuah 30th August, 2012 khan Full time a thawk turin anni pahnih hi dah ngheh an ni a. Mizoram Finance Commission hi a hmasa ber a nih avangin Report buatsaih hi hun tiam 30th October, 2014 ah zawh hman a ni lova, an hnathawh zawh tur hun hi 31st March, 2015 thleng pawh sei a ni. Tuna Report submit tak hi Saptawng a buatsaih niin Mizo Tawng a buatsaih leh mek chu March 2015 thla tawp hma a peihfel hman beisei a ni.

Mizoram Finance Commission Report in kum 5 chhung 1st April, 2015 atanga 31st March 2020 thlenga hman tur atan a rawtna a siam tur te chu - Tualchhung Sawrkar Autonomous District Council (ADCs), Aizawl Municipal Council (AMC) leh Village Councils (VCs) te hian an mawhphurhna an hlen chhuah theihna tur atan Sawrkarin chhiah a lakkhawm atangin sum a pek chhuah ve dan tur ruahmanna siam te, anmahniin an lo hman ve nghal theih tur atan eng chhiahte nge an lo khawn ve tur ni ang tih te. Hna bik leh thil bik atana Tualchhung Sawrkar te sum hman tur Sawrkarin a pek chhuah dan tur ruahman te a ni a. Tualchhung Sawrkar te sum dinhmun a that zawk theihna tur a hma an lak dan tur ruahman te bakah hian Mizoram Finance Commission in a lo hriat tel ngei ngei tur pawimawh tak tak 8 (pariat) an chhawpchhuah te a ni.

1st MFC Recommendation te hi sawrkarin a pawm chuan, village council administration a lo changtlung zawk bakah village council te thil dik lo tia puhna chhuidan tur (investigation) chiangkuang zawk pawh a lo awm tura beisei beiseina an neih thu MFC hotute chuan an sawi a. District Head Quarters leh khaw lian deuh, sawrkarin town a a puante tan pawh inawp dan sang zawk, village council mai nilo neih theihna atana ruahmanna pawh report ah hian ziah tel a ni a. MFC hotute chuan Report hautak tak mai buatsaih chungchangah Chief Minister Pu Lal Thanhawla, Finance Minister Pu Lalsawta, Finance Department leh Department hrang hrang a Officials te leh tualchhung Sawrkar ADC, AMC leh VC thuneituten an tawiawm that avangin an chungah lawmthu a sawi bawk a ni.