Department of Zoology, Mizoram University chuan Zoological Society of India, Gaya (Eastern Zonal Chapter) thawhpuina in “Impact of Climate Change on Bio-Diversity: Applications of Recent Technologies for Conservation of Threatened Species” tih thupui hmanga ni thum (22th – 24th September, 2016 chhung) awh tur National Conference buatsaih in, vawiin khan a hawnna inkhawm MZU Auditorium a neihah chuan Fisheries leh Sericulture Department changtu Minister Dr. B.D. Chakma chu khuallian a ni a. National Seminar hawnna hunah hian Zoological Survey of India (ZSI) chuan Minister Dr. B.D. Chakma hnenah “Zoological Survey of India Fellow” nihna an hlan bawk.

Khuallian chuan tunlai sik leh sa inthlak avangin kan nitin nunah harsatna a tam tial tial a, khawvelin a buaipui mek a ni a; hemi chungchang ngaihven a, harsatna kan neih te leh nungcha zinga chimral hlauhawm zual awmte hum tura tunlai thiamna hman tangkai theih dan ngaihtuah ho tura ram pum huap conference buatsaih a ni chu lawmawm a tih thu sawiin, rah tha leh tangkai tak a chhuah ngei a beisei thu a sawi a. Minister chuan mihring te hi changkanna leh hmasawnna kan um lutuk na kawngah khawvel kan chenna ti nuamtu ramngaw leh nungchate hmakhua dawn lek lovin kan che thin a, a tawp ah a tuartu bawk kan nih leh tho thin avangin “environment” ngaihsakna leh humhalh duhna thinlung hi kan intuh zel a pawimawh a ni, a ti a. Hmasawnna chu a nung mek te tan nawmsakna thlen mahse kan tu leh fa te tan harsatna leh tawrhna thlen tur thil a nih ngai chuan hmasawnna tluangtling a ni thei lo a ni, a ti. Dr. BD Chakma chuan MZU campus chu ‘environmentally friendly’ campus a ni chu entawntlak a tih thu a tarlang a. Mimal taka ZSI-in Fellow nihna an hlan chu lawmawm a tih thu a sawi bawk.

Conference hawnna inkhawmah hian Prof. G. Gurusubramanian, Chairman of Conference chuan inlawmna hun a hmang a, Prof. B.N.Pandey, Working President, ZSI leh Prof. P.N. Pandey, President, ZSI leh Mizoram University Vice Chancellor ten thu sawina hun an hmang tel a. Zoological Survey of India Director Dr. Kailash Chandra hnen atangin ZSI hmalakna ngaihtlak a ni a. Professor G.S. Solanki, Dean of Life Sciences leh Conference Organizing Secretary ni bawk chuan lawmthu sawiin hun a khar a ni.

Zoological Survey of India chuan Minister Dr. BD Chakma “Fellow” nihna a hlan bakah member thawhhlawk te hnena chawimawina a hlan thin chu vawiin hian Professor G.S. Solanki, Dean of Life Sciences, MZU leh Dr O.P. Singh, Management Director, Zo Fish Ltd.–te hnenah a hlan tel bawk. Seminar hi School of Life Sciences Complex-ah neih chhunzawm a ni ang a. National Seminar chhim tur leh paper present tur hian rampum state hrang hrang atangin mi 100 chuang an lo kal a ni.