Vawiin khan Fisheries Minister Dr. B.D. Chakma chuan ni thum awh tur Milt Cryopreservation Technology zirhona chu Tourist Lodge, Chaltlangah a hawng.

Workshop hawnna inkhawmah hian Dr. B.D. Chakma chuan tun dinhmunah Reservoir Fisheries atangin sorkar revenue-ah cheng nuai 30 zet chhunluh a ni a, mi 300 chuangin hna an hmuh phah tawh a ni, a ti. Chhungkaw 12,000 velin sangha dil an enkawl a, cage culture leh Reservoir Fisheries chu Serlui ‘B’ ah hlawhtling taka kalpui niin chhungkaw tam takin eizawnna ngelnghet an neih theih phah a ni, a ti a. Sangha chi mamawhna sang tak phuhru turte, hlawk zawka sangha tharchhuah a nih theih nan tunlai technology thar ber ber hman tangkai a tul tawh a ni tih hriain Minister chuan kawng kawhhmuh tur leh zirtir tura CIFE, Mumbai atanga mithiam rual lokal te chungah lawmthu a sawi a ni.

Sorkar flagship programme NLUP chungchang pawh sawi langin Minister chuan NLUP thawhkhatnaah beneficiary chhungkaw 1449 an awm a, thawhhnihnaah chhungkaw 1131, thawhthumnaah chhungkaw 1051 awmin heta tan hian sum pawh cheng vaibelchhe 27 chuang zet hman a ni tawh a ni, a ti. Dr. B.D. Chakma chuan a huhova sangha dil inenkawl tawm ‘Community Fish Pond’ project pawh kalpui tum niin group tinah a tlem berah mi pasarih tal awmtir tum a ni a, hemi atan hian department a thawktute pawh baseline survey nei turin hriattir an ni, a ti bawk.

Workshop and Demonstration of Milt Cryopreservation Technology hi vawiinah tanin February ni 7 thleng neih tur a ni a, heta tan hian Central Institute of Fisheries Education, Mumbai atangin Fish Genetics & Biotechnology Head of Department Dr. Gopal Krishna hovin mithiamte an lo kal a. Hawnna inkhawm hi Fisheries Department Secretary Pu Rodney L.Ralte chuan kaihruaiin Director Pu B.D. Tyagi chuan lawmthu sawiin hun hnung a khar a ni.