No.3551/2020-2020

Lengpui, 28th July, 2020 : Vawiin tlai dar 5:00 khan Fisheries Minister Pu K Lalrinliana chuan Lengpuia Sawrkarin a enkawl Sangha note tih keuna hmun Eco-Chinese Circular Hatchery tlawhin Sangha note tih keu mek a enfiah. He Sangha note tih keuna hi hun rei tak hman loha dah tawl tawh niin Minister thahnemngaihna leh hmalakna in a vawi khat nan Sangha note tih keu tuma hmalak mek a ni a, tunah hian sangha note nuai sawmriat(80 lakh) keu tur a beisei niin naktuk lamah chuan a keu fel tawh tura ngaih a ni.

Sangha note tih keuna hmun a tlawh naah hian Minister Pu K. Lalrinliana chuan Sangha a Mizoram kan intodelh theihna tur chuan a note a ka intodelh hmasak a pawimawh tih a sawi a, chu mi tur chuan Fisheries Department a thawktute pawh taima taka thawka, thahnemngaihna nen tui chilh turin a chah a. Kan thlang phaia awm hnam dang ho pawhin an tih keu theih chuan Mizoramah Fisheries Department a kan mithiamte kaltlangin kan tikeu ve thei ngei tur a ni, a ti.

Tun dinhmunah Fisheries Department hian Fish Hatchery farm hmun 4-ah an nei mek a, Lunglei, Tamdil leh Zawlnuamah te pawh Sangha note tih keuna hi awm bawkin Lunglei leh Tamdilah hian Sangha note tihkeu tuma hmalak mek a ni. Sangha chin lama tui mi pahnihin Sawrkar puihna in Zero point Kolasib-ah leh Keifang-ah Fish Hatchery Farm hi an din mek a, Zero point Kolasib-ah hian Sangha note nuai 10 bawrvel hlawhtling taka keu tir a lo ni tawh nghe nghe a ni. Minister chuan bul kan tan mek a, mi taima tan hlawhtlinna kawng a kua a ni, tiin sangha chi a intodelh turin kawng thui tak la awm mahse kawng dik kan zawh chhoh zel ka beisei a ni, a ti.