4083/2025-2026

Dated Aizawl the 21st January, 2026 : Vawiin chawhma dar 11:00 khan kum 2026 atana Fisheries Department Inhlantharna hun 'Official Briefing for 2026' chu Fisheries Conference Hall, Directorate of Fisheries, MINECO Aizawlah neih a ni a. He hun hi Fisheries Minister Pu Lalthansanga chuan Khuallian niin a hmanpui.

Pu Lalthansanga chuan Fisheries Department-in Mizoram Sawrkar hnuaiah hmasawnna hrang hrang an nei chu lawmawm a tih thu sawiin, Department-a thawktute chu tunlai thiamna thar hmang tangkai thiam tura intuaihriam turin leh an thiamna tipung tura inzir chhunzawm zel turin a fuih a. Sanghaah Mizoram chu kan intodelh theih nan tan la zual sauh sauh turin thawktute a fuih bawk a ni. Kum 2026 hian Fisheries Department kaltlanga Mizoram mipuiin malsawmna nasa zawk an dawn theih nan rinmawna leh taimakna nen hna bul tan turin thawktute chu a chah a. Kan nitin eizawnna hi kan rawngbawlna a ni tih hria a, taima tak a thawk a, kuthnathawktute ban phaka awm reng turin Fisheries Minister chuan kalkhawmte a fuih bawk a ni.

Er. Lalrothanga, Secretary, Fisheries Department chuan 'Presentation of on-going and proposed Project' tih thupui hmangin Powerpoint Presentation a pe a. Fisheries Department hmalakna zirchianna leh hmachhawpte sawizauna neiin tun dinhmunah Sangha dil hmanga eizawngtu Farmers 22,661 awmin Sangha dil 3,207, Hectare 6,000 vel a zau a awm mek a. Kum 2024 atanga kum 2025 chhungin Sangha Metric Ton 7,177 thar chhuah a nih thu a tarlang bawk a ni.

Pi Zonuntluangi, Director, Fisheries Department chuan Mizorama Fisheries din chhoh a nih dan a tarlang a. Union Territory-a a awm laiin Agriculture Department-a Wing pakhat a ni thin a. Kum 1993 ah Department puitling a hlankai niin tun dinhmunah District tinah District Fisheries Development Office (DFDO) neih a ni tawh thu te a sawi a. Directorate leh District Level-a Department dinhmun leh hnathawh dan Report a pe bawk a ni.

He hunah hian Mizoram KVI Board Chairman Upa C.Lalremliana chuan hunserh  a hmang a. Pi Zonunthari, Joint Secretary chuan Department hmasawnna tura ruahmanna hrang hrang kalpui dan tur sawi hona hun a kaihruai a. District Fisheries Development Officer-te leh Directorate of Fisheries-a thawktute an tel a ni.