MLA hlui te inchhunkhawmna pawl Former Legislators' Assocciation of Mizoram (FLAM) chuan vawiin khan Assembly house Annex a Conference Hall-ah General Body Meeting an nei a. He hun hi Pu John Roltluangliana Deputy Speaker, Mizoram Legislative Assembly chuan khuallian niin a hmanpui a ni.
Pu John Rotluangliana chuan FLAM chu pawl zahawm tak a nih thu leh FLAM member te chu party inepna leh inelna boruak chung a an awm thu sawiin ram leh hnam tan an ngaihtuahna leh an rilru seng zel turin a sawm a ni. Deputy Speaker chuan ex-MLA te pension leh an hamthatna dawn ennnawn mek a ni thu a sawi bawk a ni.
Deputy Speaker chuan politician nun chu nun chep anih thu leh mahni in veng reng a khawsak a ngaih thu sawiin mi thenkhat ten politician an nih avanga eiru leh hausa vat maia an ngai thin chu pawi a tih thu a sawi. Rolreltuten pawl hrang hrang te an rawn thin chu a thatna a awm laiin a that lohna tam tak a awm a ni tiin mipuiin rorel tura an thlan ten dik taka ro an rel chuan kalphung a dik zawk tura a ngaih thu a sawi.
FLAM General Body Meeting hi an President Pu K L Rochama'n a kaihruaia a, Pathian hnenah in hlanna hun Pastor P L Thlenga, Director Youth Mizo Conference of Seventh Day Adventist in a hmang a. He hunah hian Pu K L Thangzuala Treasurer FLAM leh Dr J V Hluna General Secretary FLAM te chuan Report an pe bawk a ni.
Assembly Annex Building a room khat FLAM Office tura tih chu Upa Rokamlova Ex- Speaker chuan Pathian hnenah hlanna a nei a ni.
FLAM hi kum 15 a upa ni tawh in Member 117 leh Associate Member 29 an awm mek a. India leh Hmarchhaka ex-MLA ten ram tana an ngaituahna leh an thiamna te hmang zul zel tura Association neih lamah hma latu a lo ni tawh nghe nghe a. FLAM President Pu K L Rochama chu All India Ex-MLA Council a Vice President chelh mek a ni.
