Ram hruaitu hlui intelkhawmna pawl Former Legislators Association of Mizoram chuan an General Secretary Dr J.V. Hluna, Pachhunga University College a mi in Professor nihna tunhnaia a dawn lawmpuinan vawiin chhun khan Education Minister Office Chamber-ah inkhawmna tawi te buatsaihin lawmpuina citation an hlan.

He hun hmanpuitu Education Minister Pu Lalsawta chuan Prof. J.V. Hluna chu mimal taka a thiantha leh a mi kawmngeih anih thin avanga a lawmpuithu hlanin hun harsa leh khirh tak tak karah pawh a thawhrimnain he dinhmun sang tak hi a hlawhchhuahtir a ni a ti a. Pu Lalsawta chuan zirna kawngah Building tha te, hmunhma changtlung leh thil ropui tak tak mamawh bawk thin mah ila, mi tumruh leh thawkrim te tan chuan chu aia pawimawh zawk thiamna leh rotling a thawhchhuah theih a ni tih hi Mizo mipui ten he hun atang hian hre thei se a duh thu a sawi a ni.

Vawiin inkhawm hi FLAM President Pu K.L. Rochama’n a kaihruai a. Prof. J.V. Hluna pian leh murna atanga chhuiin naupanlai pawha naupang tumruh leh taima tak a nih thin dan te, chhungkaw rethei tak atanga lehkha a zirchhoh dan te, nupui fanau a neih hnuah pawh natna hrang hrangin a tlakbuak chung pawha zirna sang zawk bei hram hram, mi hlawhtling a nih dan te leh ram hruaitu MLA dinhmun a luah hnua Professor nihna thawkchhuak a nih dan te chu fakin a thawhrimna zawng zawng avang hian he chawimawina hi a phu a ni, a ti.

Prof. J.V. Hluna pawhin hetiang dinhmun a thleng thei chu Pathian malsawmna liau liau a ni, a ti a. Hun leh hmun hrang hranga a thuziak leh tha a lo thawh te chuan he chawimawina hi a hlawhtir nia a hriat thu a sawi.

Prof. J.V. Hluna hian kum 1974 khan Gauhati University atangin MA (History) a zova, 1986-ah Gauhati University atang bawk hian Doctor of Philosophy degree a la a. Govt. Aizawl College Lecturer hmasa ber zing ami niin tunah hian Pachhunga University College-ah a thawk mek a ni. Ama irawm chuak saptawng leh zo tawng lehkhabu engemawzat tichhuak tawhin Seminar leh Workshop pawimawh hrang hrangah a thuziak a chhiar chhuak tawh thin a ni. Ramchhung leh hmarchhak bial zirna lam kaihhnawih pawl hrang hrang pawimawh tak takah nihna engemawzat a chelh mek bawk.

Former Legislators Association of Mizoramah hian tun dinhmunah member 103 an awm mek.