Vawiin hian P&E Veng YMA Hall, Serchhip ah District Management Unit (DMU), Fostering Climate Resilient Upland Farming System (FOCUS) Serchhip District buatsaihin district chhung khaw tin atanga AH & Vety Department aiawha ran vulh lama hmalakna buaipuitu tura thlan Community Animal Health Worker (CAHW) te tan training hmasa ber buatsaih a ni a, Bawrhsap Pi Sangchhin Chinzah chu khuallian a ni.

Pi Sangchhin Chinzah, Chairman District Management Committee (DMC-FOCUS Serchhip) ni bawk chuan, FOCUS Project hnuaiah beneficiaries tur te uluk leh felfai taka thlan a ni dawn a, a tui leh a tithei tur nia beisei te zel duhsak an nih hmela, a phurawm hle. Chung miten an hlawhtlin pui ngei theih nana lo thawhpuia lo kaihruaitu turte in nih avangin phur takin, thiam bel tumin training ngei ula, kan ram tan thil tangkai tak tithei dinhmunah in ding mek a ni, tiin training tur kal khawm te hi a fuih a. Kan ramin kan ei khawp sa kan thar thuai theih nan FOCUS hmalakna hi a tangkai hle thei dawn a ni, a ti.

He training ah hian Pu RK Lalnithanga, State Project Director FOCUS, Aizawl Mizoram chuan Fostering Climate Resilient Upland Farming System in the North East (FOCUS) awmzia leh a kalphung pawimawh zualte a sawi a, Nl. R. Vanlalruati, Gender & Community Institution hnen atangin Community Animal Health Worker (CAHW ) te hriattur pawimawh hrang hrang ngaihthlak a ni.

FOCUS Project hian Nodal Agency department Agriculture, AH & Vety, Soil & Water Conservation leh Horticulture te neiin loneitute tihhmasawn leh tlangram lo neih (Jhum Cultivation) tih danglam a, sik leh sa chhe zel tur ven hna ni telin hmalakna a kalpui dawn a, International Fund for Agriculture Development (IFAD) sum hmanga thawh tur niin district pali - Champhai, Kolasib, Serchhip leh Mamit a RD Block 11 atanga  khaw 272 a mihring 3,22,500 tuam tum a ni a, Serchhip district chhunga hian khaw 42 ah hmalak a ni a, Project hi kum 2024 thleng awh tura ruahman niin, project kalpui nan hian US Dollar maktaduai 79.30 (Cheng Vaibelchhe 539.272) ruahman a ni.

Vawiina Orientation Training hi Dr. C. Zarzokima, District AH & Vety Officer, Serchhip in a kaihhruai a. Pu C. Lalnithanga, District Project Manager-FOCUS, Serchhip chuan lawmthu sawiin training hi a khar a ni.