No.5846/2020-2021

Kolasib 7th October 2020: Vawiin chawhma khan DC Conference Hall, Kolasibah FOCUS District Level Consultation Meeting (DLCC) neih a ni a. Focus Innovation Fund hnuaia dilna 128 lutte chungchang ngaihtuahho niin kum 2021-22 chhunga MGNREGA nen tangkawpa hmalak dan tur rel a ni a, Dr. H. Lalthlangliana, Deputy Commissioner-in a kaihruai a ni.

Dr. H. Lalthlangliana chuan Kolasib district a loneitute leh ngaihtuahna thar seng a dinchhuah tum a bei tak takte dawmkan an nih theih nan Fostering Climate Resilient Upland Farming Systems in the Northeast hnuaia Innovation Fund chu kalpui tur a nih thu sawiin mi taima tak tak, hlawhtling ngei tum a hma la thin te, sawrkara hamthatna leh puihna dil nachang hre lo te zawn chhuah hi hna pawimawh hmasa a nih thu a sawi a. Sawrkar atanga tanpuina beisei tlat te erawh chu tanpuina an dawn hnu pawhin dinchhuahpui an tam loh thin thu a sawi. Kolasib DC chuan, mipuiah ruahtui khawl dan chungchanga inzirtirna neih a tul thu sawiin tui indaih lohna avanga harsatna tam zawk chu ruahtui khawlna tha nen phuhruk theih a nih thu a sawi bawk a ni.

Vawiin thutkhawmnaah hian FOCUS Innovation Fund hnuaia Kolasib district chhung a hmalak tum mi 128 atang a dilna lut te ngun taka ngaihtuah a sawiho a ni a, kum 2021-22 chhunga FOCUS leh MGNREGA thawhhona kalpui dan turte rel a ni bawk. Meeting chuan Innovation Fund diltute chu Expert Committee kaltlang a zirchianna neih hnuah a tul anga thlitfim leh nise tiin a rel a, ni 15 October 2020 hmain zirchian hna hi zo fel hman tur a tih a ni.

Innovation Fund hnuaia dilna lut tam ber chu vawk vulhah a ni a, Kuhva huan siam tum leh ar vulh a hmalak tumin an dawt a ni. Hengte bakah hian Kel vulh, bawng vulh, sangha dil, tui dahkhawlna, Dragon Fruit, Pa khawi, Rubber leh coffee sawngbawl te a tel bawk a ni. Kum 2021-22 chhunga FOCUS leh MGNREGA tangkawp a hmalakna tumnaah hian Dragon Fruit chin, Kuhva, Kuhva rah Skoping, Sangha dil, Logwood bunding, Bench Terracing, Vawk in sak, Eri rearing, Muga rearing leh rubber plantation te a tel a ni.

Thutkhawmnaah hian Pu. J.Rothanga, DAO in report a pe a, Line Department hrang hranga hotute, Thingdawl leh Bilkhawthlir BDO leh FOCUS, Kolasiba thawktute an tel a ni.