4000/2024-2025

Dated Aizawl, the 28th January, 2025: Vawiin chawhnu dar 2:00 khan International Fund for Agricultural Development (IFAD) bultum Fostering Climate Resilient Upland Farming Systems in the North East (FOCUS) Mizoram  hnuaia hlawhtlinnate thlirletna (Project Completion Report) ni khat awh workshop chu Finance Department (Taxation) Auditorium, MINECO Khatla, Aizawlah buatsaih a ni a. He hun hi Pu Khilli Ram Meena, IAS, Chief Secretary & Chairman, SCRAM chuan khuallian niin a hmanpui.

He hunah hian khuallian Pu Khilli Ram Meena chuan thu sawiin, Lo neih chu Mizorama mipui,  abikin zokhaw lama cheng mi tam berte eizawnna a nih avang leh, agriculture chu ram economy innghahna bulpui ber pakhat a nih avangin, agriculture lama hmasawnna chu a pawimawh hle tih a sawi a. Sawrkar hmalaknaahte pawh agriculture hmasawnna leh loneitute hamthatna kaihhnawih scheme-te chu uar lehzuala kalpui tula a hriat thu tarlangin, workshop chu a hlawk thei ang bera hmang turin kalkhawmte chu a chah a ni.

Vawiina workshop hi Pi Ramdinliani, Co-Chairman, SCRAM & Special Secretary to the  Govt of Mizoram, Agriculture Department chuan kaihruaiin kalkhawmte lawmna thu a sawi a. Pi Lalengzami Haolai, SPD, FOCUS Mizoram, Pu Piyush Kanal, Country Analyst, IFAD (PCR) te leh Pu Soumik Kundu, Team Lead, AFC India Ltd. (Endline Survey) te hnen atangin presentation bengvarthlak tak tak ngaihthlak a ni a. Hemi hnu hian Pi Rosy Lalmuansangi Hmar, Joint Director (LR,S&WC), FOCUS, Mizoram kaihhruaiin group hrang hrangte chuan workshop atanga an thil hmuhchhuahte sawihona an nei nghal a. Chairman-in  lawmthu sawiin workshop hi a khar a ni. 

Vawiina workshop neih hian a tum ber chu Mizorama district paruk- Champhai, Kolasib, Serchhip, Mamit leh Khawzawlahte Mizoram Sawrkar hnuaia Focus project kalpui a nih dan chungchanga stakeholder-te hmuhdan leh hmasawnna atana an vei zawngte sawitlan a ni a. Workshop-ah hian Pu Abdelkarim Sma, Country Director, Asia and Pacific Division, Pi Meera Mishra, Country Programme Coordinator leh Pu Piyush Kanal, Country Programme Analyst-te bakah, Mizoram sawrkar hnuaia FOCUS project kaihhnawih Department hrang hranga Project Management Committee member-te bakah Loneitu pawl aiawhte an tel kim hle a ni.