No.6412/2020-2021
Food, Civil Supplies & Consumer Affairs Department chuan Assam-Mizoram kawng dan chah vanga Zoramin ei leh barah harsatna a tawh lohna tura an hmalak dan a hnuai a mi ang hian an tarlang.
Tunhnaiah Assam nena kan ramri chungchangah buaina a awm a, Mizoramin chakkhai kan mamawh kan phurh luhna kawng pawimawh tak chu Assam lam miten an dang ping a. Hei hian ei leh bar leh kan mamawh phurh luh kawngah harsatna a thlen thin avangin, buaina leh manganna kan tawh lohna turin Mizoram Sorkar hnuaia Food, Civil Supplies & Consumer Affairs Department chuan Chief Minister zahawm tak leh kan Minister zahawm takte kaihhruaina hnuaiah theihtawp chhuahin hma a la a. Mipui leh sorkar, tlawmngai pawlte leh a kaihhnawih company hrang hrang te nena thawhhona tha tak leh inlungrualna vawiin ni thlenga kan la hmu zel hi a lawmawm hle a ni.
Tun dinhmunah mipuiten harsatna Iian zawk an tawh loh nan Mizoram sorkar chuan Oil leh Gas mamawh zualpui lakluhna tur kawng a dap a. IOCL thuneitute nen theihtawp in hma lain State thenawm Manipur leh Tripura atangin chawkluh dan a ruahman a. Manipur State-a Sekmai Bottling Plant leh Malom Oil Depot atanga phurhluh turin hun reilo te chhungin IOCL pawhin ruahmanna a rawn siamfel a ni. Ni 30, October 2020 khan lirthei LPG phur tur thenkhatte chuan a phur turin Aizawl-an chhuahsan a ni. Ni 31, October 2020 pawh hian Oil tankers te leh LPG phur tur truck engemawzatin Manipur an pan leh bawk a. Hmun hrang hrangah lirthei (Trucks leh Tankers) te hi chhan eng engemaw vangin Silchar leh hmundangah an tangkhang a, chungte pawh chu tlantir theih thuai beisei a ni.
Kan hun tawn dan a zirin Sorkar chuan heng kan mamawhte phurh luh zel dan turah ruahmanna a siam chho zel dawn a. Manipur bakah Tripura atanga Oil, Gas leh mamawh zualpui lakluh a nih theihnan lei/kawng tha lo laite thawmthat hna pawh a thawk mek a ni.
Tankers te hian Manipur an lut tep tawh a, LPG trucks te erawhin an lut fel tawh a ni Kalkawngah harsatna an tawk lova, an thlen chin apiangah YMA leh Zohnahthlak unaute ten mawi taka lo dawngsawngin, duhsak takin ei leh in an lo hlui a, tanpui an ngaihna ah te an lo pui zel te, an lo duat em em te hi Supply Department chuan lawmawm a tiin thlamuanthlak a ti hle a ni.
Heng Sorkar hmalaknaah te hian IOCL, Manipur Sorkar, tlawmngai pawl, Association hrang hrang te leh Sorkar hotu te tawiawmna leh tanpuina nasa tak kan dawng a kan lawm hle a ni. Mizoram chhung leh Manipur hmun hrang hrang atangin kan tlawmngai pawl te leh Zohnahthlak Unaute atangin duhsakna awka leh tawiawmna kan dawng zel te hian min ti thlamuangin chakna min pe thar thin a; Oil leh Gas phur tur a chhuak Drivers te tan pawh a thlamuanthlak kan ti hle a ni.
Hun harsa leh khirh Mizoram in a paltlang lai mekah hian mipuiten Sorkar ruahmanna te leh thupek te tha taka zawm tur leh harsatna siam lo turin kan in ngen a. Mipui te tana harsatna thlen zawng leh Sorkar hmalakna te tithuanawp zawnga mimal emaw pawl anga hma la an awm a nih chuan Sorkarin dan hmangin na takin a chhanglet zel ang. Chutih rualin, mipuite harsatna ti zangkhai a sukiang zel turin mipuite tan Sorkar a ding tlat dawn a, Mizoram mipuite tan Sorkar chuan theihtawp a chhuah zel dawn a ni. Chutih rualin, inrenchem thiam tur leh intodelh uar sauh sauh turin kan in ngen bawk e.
Tun dinhmun harsaah hian Sorkar hmalakna te tawiawm a, kan ram tana thukhat vua a tang rual vek turin Food, Civil Supplies & Consumer Affairs Department chuan mipuite a sawm nawn leh a ni.
Page Links: https://dipr.mizoram.gov.in/post/food-civil-supplies-consumer-affairs-department-press-note1604072916p
Ei leh bar leh kan mamawh hrang hrangte Mizorama phurh luh kawngah buaina leh manganna kan tawh lohna turin Mizoram Sorkar hnuaia Food, Civil Supplies & Consumer Affairs Department chuan hma a la
