Vawiin chawhma khan Food, Civil Supply & Consumer Affairs Minister Pu K Lalrinliana leh department a thawktuten inhlantharna hun Directorate FCS & CA Conference Hall ah an hmang a, Directorate FCS & CA Officer leh Staff ten kim takin an tel pui.

Khuallian Pu K. Lalrinliana chuan thu sawiin,” Supply Department chu mipuite mawmawh phuhrûk saktu a nih angin, he Department-a thawktu zawng zawng chuan tih tak zeta an mawhphurhna an hlen zêl ka beisei tlat a ni” a ti a,”Inthlahdah lo va, theihtâwp chhuah zêl turin thawktu zawng zawngte ka sawm che u a ni,”a ti bawk. Pu R. Lalchhanhima, Joint Secretary, FCS&CA leh Pu C. Zasanga, Addl. Director, FCS&CA te pawhin thu sawiin FCS & CA department hnathawh pawimawhna hrang hrangte an tar lang a, thawktute chu inlungrual tak leh tanrualna tha hnuaia hna thawk turin an fuih bawk.

Vawiin inhlantharna hun hi FCS & CA Officers & Staff Welfare Association Chairman Pu Lalrinawma'n a kaihruaia, Director Pi Shashanka Ala, IAS chuan lawmthu sawina hun a hmang bawk. Supply Directorate-ah hian thawktu officer leh staff 200 bawr vêl awmin, district office 9 leh godown (centre) hrang hrang 120 vêl an enkawl mêk a ni.