3260/2022-2023

Aizawl, 14^th January, 2023 : Land Revenue & Settlement Minister Pu Lalruatkima chuan vawiin khan Food Corporation of India Foundation Day vawi 59-na lawmna FCI kudam tual  zawl, Tanhril-a buatsaih a hmanpui a, Foundation day pualin thing a phun nghal bawk a ni.

Foundation Day pual inkhawm buatsaihah khuallian Pu Lalruatkima chuan Food Corporation of India chu India ram buhzem enkawltu, ram chhung hmun kilkhawr ber ber thlenga kan tangkaipui, a bik takin miretheite leh chhumchhiate tana malsawmna thlentu an ni tih sawiin Foundation Day vawi 59 na pualin FCI a thawkte zawng zawng duhsakna a hlan a, Khawzawla FCI kudam 3000 MT leh Sairanga FCI kudam 10000MT sakna turah pawh Revenue department lam chuan an tih tur an kuta tla chu an tihfel sak vek tawh tih sawiin tluang taka kudam tha leh changtlung tak an sak zawh thuai theihnan duhsakna a hlan a, fur laia buhfai khamkhawp kan hmuh reng theih nan heng kudamte hi an tangkai lehzual dawn a ni a ti.

Foundation Day puala thing phun runpui (plantation drive) an nei tur chu lawmawm a tih thu sawiin Pu Lalruatkima chuan sik leh sa leh environment dinhmun chhe zel tur venhimna atan a tangkai hle a ni a ti a. Khawvel sik leh sa dinhmun tlahniam zel hi mithiamten an vei em em a, khawvel huapin tan an la mup mup tawh a, keini Mizorama chengte chuan kan la hrethiamin kan la vei lutuk rih lo niin a lang deuh a, hetih rual hian kan phak tawk tawkah tan kan lo lak ve a tul tawh hle a, mipuite zirtirtu ah kan tan a ngai takzet tawh a ni a ti. Khua a lo thal leh tan  tawh a, kangmei lakah kan fimkhur hle a ngai tih sawiin kan tih tur leh tih loh tur kan inhrilhhriat thar mawlh mawlh a tul a, a bik takin ram kang hian min nghawng na thin a, thing leh thlai bakah nungcha tam takin an thih phah thin a, ngai awh leh turin kum tam fe hun a duh thin bawk nen kan zavaia kan tanrual a tul hle a ni a ti a. In kang pawh kum tluanin a awm thin a, in kan tihkan loh nan kawng hrang hranga kan fimkhurna tur sawrkarin thuchhuah a siam thinte zawm that a pawimawh hle tih a sawi bawk.

FCI, Divisional Office Aizawl mawhrphurhna la mektu, Pi Zodinpuii Ralte chuan FCI in ram pum leh Mizorama hma a lak dante tarlangin AY leh PHH beneficiaries te tan sawrkar laipuiin kumin chhung buhfai a thlawnin a sem dawn a, tunah hian retailer ten an sem tan mek tawh a ni a ti a. He ruahmanna hi a tul anga pawhsei tura tih a nih thu sawiin tuna buhfai sem mek Grade A chu fortified rice a thlak vek tura ruahmanna kalpui mek a nih thu a sawi bawk a, fortified rice chu mihring ei atan a hlauhawm loh tih sawiin mithiamten uluk taka an buatsaih a nih bakah iron, folic acid leh vitamin B-12 a tel avangin mihring tan a tha hle zawk a ni a ti.

Mizorama buhfai kan dawn FCI kudama rawn thleng tharte chu kum 2022-2023 crop year a that chhuahte an nih thu sawiin kan vannei takzet a ni a ti bawk.

FCI hian Mizoram pumah Food Storage Depot (FSD) 6 nei mekin 2 dang Sairang leh Khawzawl kudamte pawh reiloteah sak zawh thuai beisei a ni.

Tun dinhmunah FCI kudam, Tanhrilah hian buhfai bag 41211 awmin quintal 20310 a awm a ni.