Vawiin khan Pu H.Rohluna, Environment &Forest Minister leh a thiannu Pi Lalbiaknii te chuan an inneih kum 21-na hriatreng nan Lengpui Airport road ah thing an phun. He thingphun programme ah hian Pu Rohluna chuan Zoram tlang nuam leh boruak hrisel siam turin tute pawhin thingphun leh enkawl uar turin a chah a, mipuite tana tangkai leh hlawkna a nih theih nan an thingphunte chu a hlan nghal a ni. Dr. S.S.Garbyal, Principal Secretary leh PCCF pawhin thing hi a phun ve bawk.
He programme kaihruaitu Pu Lalthangliana Murray, Conservator of Forests chuan Sponsor tree Planting Policy hnuaiah hian mi hrang hrangin thing tiak 128 phun tawhin heng thing phuntute hian an chhungte boral tate pualin emaw nau piang pualin emaw chhungkua/mimal nuna ni pawimawh chhinchhiah tlak hmingin an phun thin a ni. He policy hi tu tan pawh tih theih niin chutiang duhte tan mahni bialtu DFO hnenah Rs.2500/- pe in a tih theih reng a. Forest Department in thir kuala hung vekin a phun a, kum 3 chhung a enkawl a, a sponsor tu hming leh a chhan te a tarlang thin tih a sawi a ni. He function tawite hi Forest Officers Pu Vanlalsawma, Conservator of Forests, Pu V.Lalfala, DFO, Aizawl te leh staff thahnem takin an tawiawm a, Minister-te nupa kum 21 chhung tluang taka an lo inkawp tawhna lawmpuina te an hlan nghal bawk a, tlaiah Sairang Central Nursery ah chawhlui an kilpui nghal bawk.
Thingphun hnu hian Minister leh a thuihruaite hian Industrial Estate hmun tur Dialdawk ami te Bamboo Setum Lengpui a mi leh Green Mizoram Programme atana inpuahchahna kal mek Nursery te an tlawh bawk.
Green Mizoram programme 2011 atan E&F Department pawh an in puahchah fel vek tawh a, Sairang leh Tuirial nursery atangin thing tiak chi hrang hrang 30 chuang feet 2 aia sang thiau 1,80,000 sem chhuah tur an nei vek tawh a ni.
