81/2022-2023
Aizawl, 7th April, 2022 : Vawiin khan Pu T.J. Lalnuntluanga, Minister of State, EF&CC Department chuan Tamdil ah "Resource Development and Sustainable Livelihood Improvement under Tamdil Wetland" hawnna hun a hmanpui a. He scheme in a tum ber chu Tamdil chheh vel khua a cheng ten ramngaw tichereu zel lova eizawnna ngelnghet an neih theihna tura chhawmdawl hna thawh a ni.

He hunah hian Minister T.J. Lalnuntluanga chuan Tam dil leh a chheh vel khaw mi ten Tam dil an venna ah leh humhalhna ah lawm thu a sawi a, Tam dil chu uluk taka venga humhalh chhunzawm zel turin a chah a, neitu chan changa theihtawp chhuah zel turin Tam dil khaw chheh vel mipui kalkhawmte a sawm a ni. Tam dil chhehvel khua 4 ten Tamdil bula awm an nih avanga hamthatna an dawng thei tur chu lawmpuiawm a tih thu a sawi a. India sorkar laipui chuan heng tui hmun (Wetland) enkawl that hi a ngai pawimawh em em a, a enkawl dan tur ruahmanna mumal tak EF & CC department-in an siam thu a sawi a. Environment, Forest & Climate Change Department Mizoram chuan kum 5 chhung Tamdil enkawl dan tur Integrated Management Plan Rs.980.81 lakhs hu a siam a, chu chu sorkar laipuiin pawmin a kum khatna 2020-21 khan Rs.202.95 lakh an rawn pe a, Chief Minister Pu Zoramthanga’n sum kan dawn theihna tur atan state sorkar atanga doletna Rs.22.55 lakhs min ruahman sak bawk a ni a ti a. He sum hmuh atanga Tamdil chhehvel khaw 4 a chhungkua ten hamthat nan an hmang thei tur chu lawmawm a tih thu a sawi bawk a ni.

“Resource Development and Sustainable Livelihood Improvement” scheme hnuaiah hian chhungkaw 206 hnenah Rs.50,000 hu theuh, a vaiin Rs.103.00 lakhs sem chhuah niin, he scheme hnuaiah hian Tamdil chhehvel khuaa chhungkaw hrang hrang hamthatna pe a hma lak zel tur a ni.

He programme hi Pu Jitendra Kumar, IFS, Principal Secretary & PCCF, EF&CC Department in kaihruaiin, Pu Ritu Raj Singh CWLW, Pu Pee Lee Ete IFS CF (R&D), Pi Lalrammawii Sailo CF (CC), Pu Laltlanhlua Zathang, IFS, DFO, Aizawl leh Department officers te an tel a ni.