1422/2024-2025

Aizawl 2nd August, 2024 : Pu Lalthansanga, Forest Minister chuan vawiin khan Synod Conference Centre-ah Pu M. Sawmliana lehkhabu ziah The Book of Mizoram Plants, (Includes Wild Animal, Birds, etc.) 3rd Edition chu a tlangzarh. 

Lehkhabu tlangzarhtu Forest Minister chuan kan ram ngei a awm thlai hrang hrang, nauban, sava leh ramsa, rannungte tarlanna lehkhabu The Book of Mizoram Plants, Pu M. Sawmliana ziah tlangzarh theiha a awm chu lawmawm a tih thu sawiin thangthar lo la awm zel tur tan te, zirna sang leh zirbingna lama lehkhabu tangkai tak a nih ngei a beisei thu a sawi a. Forest department a thawkte'n dan hnuaia kan ram ramngawte an enkawlna-ah lawmthu sawiin kan ram hmasawnna ruhrel tithuanawptu ang hiala tunhma atanga mipuiin forest department an ngai thin chu pawi a tih thu a sawi a. Forest enkawlna chu India danpui concurrent list-a awm a nih avangin dan hnuaiah khuahkhirhna tha tak nen humhalh a ni a, chuvang chuan EF&CC department chu namnul mai chi a nih loh thu a sawi. 

Khualzahawm Pu H. Lalengmawia, IAS, Commissioner & Secretary pawhin thu sawiin lehkhabu tlangzarh tak chu taimakna leh tuichilhna nena khawrpum ngei a nihzia a lang chiang hle a ni tiin a ziaktu tumruhna chu entawn theuh turin kalkhawmte a chah a. Khawvel civilization bul tanna Scientific enquiry pawimawhna chungchang sawiin kan ram hmasawnna kalzel a pawimawh em em dilchhutna nei theuh turin leh kan ecosystem siamthatna kawngah ngaihtuahna seng turin kalkhawmte chu a chah bawk a ni. 

Lehkhabu tlangzarh tak ziaktu Pu M. Sawmliana hian Glossary of Botanical Names (1983), Some Mizo - Botanical and Zoological Names (1988), Mizo - Botanical and Zoological Names (1998), Forester's Field Guid for E&F Deptt., Mizoram (2009), Forester's Field Guide for Deptt. of Env. Forests & Climate Change, Mizoram (2017), The Book of Mizoram Plants (Includes Wild Animal, Birds, etc.) 1st edition (2003), The Book of Mizoram Plants (Includes Wild Animal, Birds, etc.) 2nd edition (2013), The Book of Mizoram Plants (Includes Wild Animal, Birds, etc.) 3rd edition (2024) te a buatsaihin a lo ziak tawh a ni. 

The Book of Mizoram Plants 3rd edition chhungah hian Plants - 1914 spp, Orchids - 343 spp, Wild Animals - 92 spp, Birds - 600 spp, Reptiles - 148 spp, Amphibians - 65 spp, Insects - 60 spp awmin thlalak lam Plants (Thlai) -  1710 nos, Orchids (Nauban) - 180 nos, Wild Animals (Ramsa) - 32 nos leh Birds (Sava) - 81 nos a awm a. Phek 563 a chhah niin Chapter 18-ah then a ni a. A man hi ₹ 3500/- a ni dawn a ni. 

Lehkhabu tlangzarh Programme hi Pu Lalnuntawma Fanai-in kaihruaiin Prof. Lalbiakdiki Hnamte, MZU chuan lehkhabu thlirlawkna a nei a. Pi Lalnunziri, Pu M. Sawmliana nupui chuan kalkhawmte hnena lawmthu sawina a nei a ni.