554/2024-2025

Aizawl, 24.5.2024: Kan hma lawka furpui lo thleng tur atana inbuatsaihna chungchang vawiin khan Disaster Management & Rehabilitation Department ruahman in Secretariat Conference Hall-ah district tin a inrelbawlna hotute nen sawihona buatsaih a ni.

He inhmuhkhawm hi Disaster Management & Rehabilitation Minister Pu K. Sapdanga chuan hovin, DM&R Department hmachhawp chi hrang hrangte sawiin, District tin hotute thahnem ngai taka chhiatna thlengte endik thuai a chhawmdawl ngaite chhawmdawl nan hma lo la rang thin turin a ngen a. Chhawmdawl ngaite chhawmdawlna tur pawisa pawh Sawrkar lamin a theih ang angin a ngaihtuah zel tur thu a sawi a. D.C. lamte pawhin chak taka lo bawhzui zel turin a ngen a ni. Hetih lai hian dan in a phal chin te uluk taka lo enchik thin turin a chah a ni.

Meeting ah hian District Disaster Management Authorities (DDMA) Chairman ie, Deputy Commissioner zawng zawngte koh khawm an ni a. Pi K. Lalrinzuali, Secretary, DM&R Department chuan a kaihruai a. Khuarel chhiatna thleng thei laka District tin lo inpuahchah dan leh chhawmdawlna awm theite leh kaihhruaina a hriat tur tulte Dr. Lalrokima Chenkual, Deputy Director (Trg.) in PPT hmanga sawiin, sawihona hun hlawk tak hman zui a ni.

District tin DC te leh Disaster lam khawihtu Officer te leh DM&R Department hotute he hunah hian an tel a. Chhawmdawlna sum hman dan leh an mamawh dante leh, khuarel chhiatna lo thlen thulh a hmalak dan tur hrang hrangte sawiho a ni.