1702/2022-2023
Aizawl, the 25th August 2022 : Principal Secretary, General Administration Department Pu Navin Kumar Choudhury chuan vawiin khan District 11 te Deputy Commissioner leh an aiawhte chu video conferencing hmangin meeting pawimawh tak a neih pui a. District Administration te hnathawh dan leh tun aia tha zawka mipui rawngbawl hna an kalpui theih dan kawng hrang hrangte a sawipui a, ruahmanna engemaw zat tha nia a hriat te, a tarlan tak te chu a taka kalpui turin DC tin te a chah a ni.

GAD Principal Secretary chuan DC hova hetiang meeting hi thlatin Ningani tawp berah neih a nih tawh tur thusawiin heng meeting ah hian DC te hnathawh te bakah an harsatna te sawiho a ni dawn a, chu mai bakah Secretary hrang hrang te pawh heng meeting ah rawn telin an Department chan theuha District hrang hranga hmalakna an neih mek leh ruahmanna an siamte DC te an sawipui thin anga, DC ten henga harsatna an neih leh tawh te chu a Department changtu Secretary ah an thlen thei ang, a ti. A bultan nan vawiin meeting ah hian Commissioner and Secretary, Health & Family Welfare, Pi Esther Lalruatkimi leh Secretary, School Education Department Dr. Lalzirmawia Chhangte te an tel a ni.

Meeting ah hian GAD Principal Secretary chuan mipui te hnena inrelbawlna tha zawk a thlen theih nana DC te mawhphurhna leh hemi atana tul leh pawimawh nia a hriatte chu a sawi lang a. Chung zingah chuan mipuite vuivaina aw leh an harsatna tawh te thuneitute hnena a thlen vat theih nan District a grievance redressal mechanism siam te, District mipuite mamawh chiang zawka DC ten an hriat theih nan District huam chhunga khua ah te zan riak a khua tlawh te, an hnuaia District Officer hrang hrang te hnathawh vil te, emergency services leh tul pawimawh dangte entik lai pawha a that theih nan hengte vil te an ni a. District ah hmasawnna hna hrang hrang thawh mek te chu enzui leh an thlen chin te a khat tawk a enpui te, District tinin an District potential te hria a, chu chu entin nge mipui tam zawkin an hlawkpui theih ang tih kawng dap te chu ngaipawimawh turin a chah tel bawk a ni.

Vawiina meeting ah hian Health & Family Welfare leh School Education Secretary te chuan an Department chan hnuaia an ngaihpawimawh zual bik te an DC te an hrilh a ni.