Transport Department chuan Aizawl khawpui motor neitute Garage an neih tul chungchang meeting-in thuchhuah an siam. 

Aizawl khawpui lirthei lo pung zelin a tih tawt avanga chet vel harsa ta em em tihziawm nan sawrkarin ‘Aizawl Traffic Jam Free’ policy a kalpui mek tih kan hria a. Kum 2010 atang khan heng traffic jam lo awm zel tur ven lawk nan Transport Department lam pawhin Mizoram M/V Rules 1996 te siam danglamin ‘lirthei register tur chuan a lirthei dahna tur garage a nei ngei ngei tur a ni’ tiin thuchhuah pawh a lo nei tawh a, October 2013 atang khan chu dan chu hman tan a ni chung pawhin lirthei lo pung zelin khawpui kawng a ti chep zel a, Traffic Jam in ziaawm lam a pan thei chuang lo a ni. Chutiang chu ni mahse traffic jam hi tun atanga a ziaawm nana kan thawh zel loh chuan kum tam a liam leh hmain kan khawpui kawng hi  a kal theih loh thuai dawn a ni tih hriain sawrkar chuan Coordination Committee on Traffic Management kal tlangin khawpui chhunga lirthei dahna tur garage kum khat leh thla hnih chhungin an nei vek tur a ni tiin thuthlukna an siam a, chutichuan 1st October 2016 atanga 30th November 2017 thlenga garage neih vek hun tur bitukin sawrkar pawhin Notification a chhuah ta nghe nghe a, chu huntiam chu tunah a lo zo ta tep a, lirthei neitute inpeih a ngai ta hle a ni. 

Lirthei neitute hi kan lirthei hmang tangkai hlei thei lo khawpa traffic jam hrehawm ti bertu zinga mi an nih avangin traffic jam siamtu kawng sira lirthei dah lova, in thiar fihlim hmasa ber tur pawh an ni awm e. 

Chuvangin, lirthei neituten Aizawl Traffic Jam tih rehna kawnga hma la hmasa ber tur an ni tih hriain, kawngsirah lirthei dah lova Garrage tha tak hun tiam chhunga nei vek turin tan an lak tak tak a ngai ta. 

Thla khat emaw lek hun kan neih chhung hian kan lirthei kawngsira dah lova Garrage nei vek turin tan la ila. Ram roreltute thupek zawmtu chu ram tana thawk tha an ni a, zawm lova dan bawhchhetu erawh ram hmelma an ni. A bawhchhetu chu hrem a ni dawn sia tiin Transport Department chuan thuchhuah an siam a ni.