Mizoram sorkar hnuaia Land & Revenue Settlement Department-in January ni 22, 2017 khan Guahati High Court Order ni 15.11.2017 avanga Land Acquisition chawlhsan rih tul thu chungchang thuchhuah a siam chu vawiin khan Aizawl DC Office atangin puangzar tura lehkha hmuh a nih angin a hnuaiah hian mipuite hriat turin chhuah a ni e :-

Gauhati High Court, Aizawl Bench (Single Bench) chuan, WP(C) No.20/2014 leh WP(C) No. 30/2014 (Lunglawn, Lunglei-a Assam Rifles tana ram lak (acquire) sak ten ‘Right to Fair Compensation, Transparency in Land Acquisition, Rehabilitation and Resettlement Act, 2013 (RFCTLARR Act)’ hnuaia an ram lakte compensation pek an duh thu an thlen chungchanga Order dated 15.11.2017 a siamah, Mizoram Sorkar-in Article 371G-in a humhalhna hnuaia a lo siam, Mizoram (Land Acquisition, Rehabilitation and Resettlement) Act, 2016 (MLARR Act, 2016) chu President of India pawmpuina a awm loh avangin Mizoram chhunga hman theih loh a nih thu leh Lunglawn-a ram neitute pawh Compensation pek tur ang ang chu Order chhuah atanga thla 4 (li) chhungin assess fela, thla 3 (thum) dang leh chhungin a dawng turte hnenah pek vek tur a nih thu a chhuah a. –

He High Court Order avang hian Mizoram State chhunga MLARR Act, 2016 hnuaia land acquisition kalpui mek zawng zawng chu chawlhsan nghal a ni a. Mizoram Sorkar chuan Gauhati High Court, Division Bench-ah Single Bench Court Order-a MLARR Act hnawl a nihna thu hi rang takin a Appeal nghal a. Appellate Court hi rei rial lova thutlukna Order chhuah thuai tura ngen a ni a, Land Acquisition hma lakna pawh chhunzawm thuai beisei a ni. Land Acquisition chawlsan lailawkin harsatna a thlensakten an lo hriatthiam beisei a ni bawk e.