Vawiin khan Pu Vanlalngaihsaka, Returning Officer,1- Mizoram (ST) kaihhruaina hnuaiah General Election to Lok Sabha 2019 leh 15-Aizawl West 1 bye-election a vote chhiar dan tur inbuatsaihna kalpui mek a ni a, Electronically Transmitted Postal Ballots System (ETPBS) a vote tla chhiar dan chungchangah thutharthehdarhtute nen inkawm hona hun neih a ni bawk.

DC Conference Hall, Aizawl ah chawhma khan Vote chhiar leh Suvidha chungchangah Data entry Operator-te tan training buatsaih a ni a, Planning & Programme Implementation Department Conference Hall ah Candidate leh Political Party aiawhte tan ETPBS chungchang inzirtirna neih a ni bawk. Hemi rual hian Vanapa Hall ah Pu Vanlalrova, Deputy Director, Department of Sport & Youth Services in Counting Agents te hnenah vote chhiar ni a an tih tur leh mawhphurnate presentation hmangin zirtirna a pe a, Pu K Laltlawmlova, SDO (Sardar), Aizawl in thutharthehdarhtute hnenah ETPBS chungchangah zirtirna a pe bawk.

Pu Vanlalngaihsaka, RO, DC Aizawl chuan,” Vote chhiar ni hian ETPBS chhiar chhung hi a rei dawn a, uluk taka QR scanner nen a endik zel a ngaih dawn avangin ETPBS vote pakhat chhiar chhung hi minute khat aiin a rei thei a ni”, a ti a ,”ETPBS hi vawiin thleng hian 3119 dawn a ni tawh a, vote chhiar tan hma thleng dawn belh zel theih a ni,” a ti bawk.

Vawiin chawhnu khan Dr Mamata BR, IAS, General Observer hovin Counting centre te endik a ni a, Aizawl DC, Aizawl SP leh ARO ten an tawiawm a ni.