2528/2023-2024

Khawzawl, 28th October 2023: Vawiin khan Khawzawl DC Meeting Hall-ah Election Commission in 22-Tuichang (ST) A/C vil tura a ruat General Observer Pu Amit Singh Bansal (IAS), Expenditure Observer Pu Shridhar Dora (IRS) leh Police Observer Pu Aotemsu (IPS) hovin thutkhawm neih a ni a. Mizoram Inthlanpui neih tura Khawzawl District inbuatsaihnate thlirhona leh sawihona neih a ni.

He hunah hian Khawzawl DC Pu K. Lalrohlua chuan Inthlanpui kaihhnawiha Khawzawl District inpuahchah tawh dan leh hmabaka ruahmanna awm te inhrilhhriatna hun PowerPoint Presentation hmangin a nei a. Khawzawl SP Pu Lalchhuanthanga chuan venhimna kaihhnawiha inpuahchahna te a sawi ve bawk.

General Observer Pu Amit Singh Bansal chuan Inthlanpui neih tura Khawzawl inbuatsaihna chu tha thawkhata a hriat thu a sawi a; inthlanna felfai, thianghlim leh muanawm neih a nih ngei a beiseiawm, a ti.

Expenditure Observer Pu Shridhar Dora pawhin inthlanna muanawm leh felfai neih theih a beisei thu a sawi a. Police Observer Pu Aotemsu chuan Mizorama Inthlanpui kaihhnawiha a lo kal tum hnihna a nih thu sawiin, Inthlanpui felfai tak neih anih theihna’n a Mizoram People’s Forum hnathawh chu ropui a tih thu a sawi bawk.

He hunah hian Khawzawl District-a Inthlanpui buaipuitu Nodal Officer te, Political Party leh Candidate aiawh te, Mizoram People’s Forum aiawh leh Mizoram Journalist Association member te an tel a. Meeting zawhah hian  Observer hian EVM dahna Strong Room a tlawh a, Postal Ballot hmanga Vote thlakna tur Ballot Box pawh political party aiawh te hriatpuinain kalh (seal) a ni bawk.