Vawiin chawhma khan Geology & Mineral Resources(G&MR) Minister Pu H.Rohluna chuan Parliamentary Secretary Pu Joseph Lalhimpuia; KVI Chairman Pu K.Lianzuala; Dr H.Lallenmawia, Director, G&MR; I&PR Official leh Kolasib MJA member-te hruaiin ONGC in hydrocarbon laihchhuah tuma kut a thlak mekna Tawitaw Bungalow bul, Zanlawn a mi leh Gas hmuhchhuah tawhna Meidum khaw ram chhung ami te a hmunah kalin a endik a. Minister hi Pu M.C. Das, General Manager, Mizoram Block, ONGC leh a thawhpui ten lo dawngsawngin an hmalak leh thil tum te an lo hrilhfiah a ni.

G&MR Minister Pu H.Rohluna chuan Mizoram chhunga leilung hausakna haichhuah runpui thawhmek ah hian sawrkar a hmanhmawh rualin a fimkhur hle a, ram leilung fate’n an chanvo tur an chan ngei ngei na turin sawrkar in theihpatawp a chhuah tak meuh a ni a ti a. ONGC hotute pawh an hna chak lehzuala kalpui tur leh a rang thei ang bera hralh chhuah theih turin oil emaw gas pawh ni se an haichhuah sawrkarin a duh thu a hrilh a. An thiltih ah hlawhtlinna a lo thlen hun pawhin an lo inremna thuthlung anga ram leilung fate hamthatna tur buatsaih turin a hrilh a ni. ONGC hotulu ber ber CMD leh Director, Exploration te nen pawh vawi tam tak an inkawm tawh thu sawiin chu chuan awmzia pawh a neih nasat hle thu a sawi a. Hydrocarbon Rig awmna bula chengte chu an hma lawkah hamthatna tam tak an tel dawn a ni tih hriaa hnathawktute chungah that chhuah tura chah in heng ONGC leh OIL te hmalakna hi Mizoram tan sum leh pai a hmasawnna thlentu tur a la ni tih hre tlat turin a chah a ni. Hortoki kawng dungah hmun hnih ah hrydocarbon zawn hna hi thawh leh tum a ni a chumi atan chuan Environment Clearance leh Forest Clearance te buaipui mek a nih thu a tarlang bawk a ni.

Thusawitu dang, Parliamentary Secretary Pu Joseph Lalhimpuia chuan Mizoram ah leilung hausakna haichhuah tur a awm tih a chiang tanin a lan thu sawiin heng Oil/Gas laihchhuah avanga hna kau tet lo awm turah Mizo thalaite chu a tam thei ang bera chhawr an nih theih nan sawrkarin ruahmanna fel tak a neih tawh thu a sawi a. College 2 ah leh Higher Secondary School 2 ah Geology subject zir theihna pawh sawrkarin a hawng tawh a, chu chu Mizo thalai ten bengkhawn se a duh thu a sawi a ni. Pu Joseph Lalhimpuia chuan ONGC hotute chuan tun aia nasa zawka civil mite hamthatna an sihchhuah a ngaih thu a hrilh in Delhi ah Minister tirh anga a kal thuai tur thu sawiin Civil mite tana an hnathawh hi chiangkuang taka Chief Managing Director, ONGC hrilh a tum thu a tarlang a ni.

Minister zawhna chhangin ONGC hotute chuan Mizoram leh Tripura leihnuai a leilung te an in an loh thu sawiin gas emaw oil emaw hi a State pakhat zawk leihnuai atanga a thenawm state hnuaia awm chu lak pen theih a ni lo an ti. Kum hmasa lam a Meidum drilling site atanga tanker bullet lian hmanga gas phurh thlak ni awma sawi chu LPG Gas ni lovin Drilling Rig a hman tur Liquid nitrogen an rawn phurhna tanker kirleh lam a nih zawk thu sawiin gas te hi an thu thu a tanker a phur ngawt theih a ni lo a ti a. Meidum Hydrocarbon Exploratory Well ah hian 3.85 Kms verh a nih hnu in gas 2.2 billion cubic metre hmuh a ni a, a tam lam hi duhthu a sam chiah loh avangin gas tam zawk hawr khawm turin object 3 leh object 4-na a mi te chu hyrdofracturing hmang in hmunkhat ah an khawm mek thu ONGC hotute chuan an sawi a. Hydrofracturing hi March 12 chuan zawh hman inbeiseiin a rang lama commercial production stage (hralhchhuah theih hun) an thlen a rinawm thu an sawi a. Commercial Production stage an thlen hun chuan khawtual mite inhlawhna tam tham tak a awm dawn bakah ONGC Site Office pawh Mizoram ah din a tul dawn a ni ONGC hotute chuan an ti a.

Zanlawn khawdai a Hydrocarbon Exploratory Well laih hna hi January thla tir khan tan a ni tawh a. Hydrocarbon Exploratory Well hmunhma atan hian 40,000 Square Kilometers an neih thu tarlang in Leivung 1,20,000/- Cubic Meter paih tur a awm dawn a, April 7 ah chuan leiverh hman an tum thu ONGC te hian an tarlang. An khawl lian tak tak hnuh Silchar atanga Zanlawn hnuh thlen nan hian Kawnpui leh Zanlawn inkarah kawngzim lai hmun 8 ah zauh hna an mahni in an thawh theih nan Border Road Organisation(BRO) hnen atang pawhin phalna an neih tawh thu an sawi a. Heng kawngzim laih zauh hna an thawh lai hian Civil Administration puihna bakah mipui vantlang leh khualzin veivakte ngaihthiamna an mamawh thu an sawi a ni.