No.1543/2020-2021

Vawiin chawhma dar 10:56 khan Goa atanga Mizoram mi leh sa tangkhang, Shramik Train hmanga lo haw, mi 734 te chuan Bairabi rel chawlhhmun an lo thleng a. Dr H. Lalthlangliana, Deputy commissioner, Pu Vanlalfaka Ralte, SP leh Kolasib district thuneitu, tangkhang te dawnsawnna kawnga mawhphurhna hrang hrang nei ten an lo hmuak a ni.

Rel in Bairabi an lo thlen rual hian rel chhungah ei leh in pek an ni a, Screening point 10 kaltlang a endik vek an nih hnuah an district theuh panna tur bus ah luh tir nghal an ni. Bus hian Station a chhuahsan hnu hian Liason Officer te kaihhruaina hnuaiah an hawna tur district theuh bus hmangin pan tir an ni.

Vawiina Goa atanga lo haw te hi a tira haw tura in report zat chu 790 an ni a, Bairabi rel chawlhhmun rawn thleng zat inchhiarnaah erawh chuan mi 734 an ni a. Aizawl district mi 426, Lunglei district mi 37, Serchhip district mi 50, Kolasib district mi 61, Champhai district mi 66, Siaha district mi 11, Mamit district mi 21, Lawngtlai district mi 24, Saitual district mi 16, Khawzawl district mi 14 leh Hnahthial district mi 8 an tel a ni.

Goa atanga lo haw te hian Bairabi a tlawmngai pawlten an lo buaipuina avanga lawmthu sawi nan coach tina chuang ten pawisa an thawhkhawm a, an pawisa thawhkhawm Rs. 54000/- bawr vel chu Bairabi rel chawlhhmuna tangkhang lo hawte buaipuitu tlawmngai pawl hrang hrang hnenah an hlan a ni.

Kolasib district thuneitute ruahmanna in District hrang hrang a mi te hi Liason Officer ruat bik theuh ten an lo buaipui a, kawng laka harsatna a awmloh nan escort te nen Kolasib district ramri chin thleng an thlah vek bawk a. Rapid Antibody Test (RAT) hi an awmna tur Quarantine Facility an thlen hunah tih tawh tura ruahman a ni a, Bairabi chhuahsan hnu hian Meidumah ding tawh lovin an awmna tur Quarantine Facility an pan ding nghal a ni. Rel chawlhhmun hmanga lo haw te sulhnu hi Sanitation team ten fimkhur tak leh tha takin an senghawi nghal bawk a ni.

Tangkhangte Bairabi atanga phur chhuak tur bus driver leh handyman te hi kohkhawm a, an kal dan tur chiang tak a hrilh an nih thin bakah, ruihtheihthil laka fihlim tur a hrilh an ni a. Police ten a khat tawkin an vil reng bawk a ni. Vawiin pawh hian Excise & Narcotics department duty te nen uluk takin bus chhuah hma hian endik leh an ni a, fihlimlo mi 6 man an ni.

Mizoram mi leh sa tangkhang, Bairabi rel chawlhhmun lo thleng te ei leh in tur hi Catering service te kaltlanga buatsaih thin a ni a. Rel lo thlen hun a danglam fo avanga ei tur lo buatsaih lawk kawngah harsatna a awm thin avangin Bairabi North YMA te hnenah ei leh in lo buatsaih hna hi hlanchhawn a ni a, sawrkar rate pangngai angin tlawmngai takin anni hian an buaipui chhunzawm ta a ni.