No.1575/2020-2021

Tukin zing dar 4:15 khan Covid 19 hrileng avanga Goa-a tangkhang mi 15 ( Hmeichhia 13 leh Mipa 2) ten Khawzawl an thleng leh   a, Zuchhip Field No-1 a Screening Point-ah Khawzawl Bawrhsap Pu H Lianzela leh Medical team te bakah Zone hrang hrang-a Management Team ten an lo dawng sawng a ni.

Lo thleng tharte hi dan anga an hriselna endik sak an nih hnuah khung hranna tura ruat KVK Farmers’ Hostel leh Tourist Lodge-ah dah nghal an ni.

Tun dinhmunah Khawzawl District chhungah hian Covid 19 hrileng avanga  Quarantine Centre leh Isolation Centre-a khung hran mi 153 an awm mek a ni. Tangkhang rawn haw te zinga RAT test reactive mi 4 leh an contact persons mi 28 (an vaiin mi 32) te swab sample ZMC-a test tyra thawn pawh result chhuak kim tawhin an vaiin a negative vek ani.

 Vawiin vêk chhun dar 12:00 khan Dulte VLTF ten an khaw thlai thar chi hrang hrangte Khawzawl DLTF hnenah an hlan a, Khawzawl DLTF Chairman leh DC Pu H Lianzela leh DC Office-a Officer te bakah Media Officer Pu PC Lalchandama DFO ten  a lo dawngsawng ani.

Thlaithar inhlanna inkhawm tawi ah hian Pu H Lianzela chuan Dulte VLTF te'n  Quarantine Centre-a awmte leh Frontline worker-te tana an thlaitharte engmah beisei let nei lova an pe chu lawmawm a tih thu a sawi a. Hripui in harsarna nasa tak a thlen karah pawh mahni ngawt in ngaihtuah lova midangte tana inpek hi a Mizo a, a Kristian hle bawk a ni ati. Dulte VLTF te chuan an thlai thar chu pek duhna hmun bik an neih loh thu leh DLTF ten Quarantine centre leh tul an tihna hmun apianga an sem tura an pek anih thu an sawi bawk. Dulte VLTF ten thlai thar an rawn pek hi Antam tel 511, Phuihnam tel 22, Aidu tel 11, Balhla hel leh hmin tam tham tak, Nimbu bag 1, Maian tel 4 leh Changkha tel 1, a vaiin bag 50 a ni.

Ni.1.06.2020  khan Khawzawl Venglai Presbyterian Kohhran chuan an Kohhran Hall-a khung hran mek te ei leh in sen so atan Khawzawl DC hnenah Rs 30000.00 an lo hlan tawh bawk.