Vawiin khan Government Hnahthial College chuan an College Auditorium-ah Graduation Day and Freshers' Social hun an hmang a, he hun hi bialtu MLA Pu John Siamkunga, Chairman Mizoram State Law Commission chuan khuallian niin a hmanpui a, India International Footballer, Hnahthial tlangval Jeje Lalpekhlua pawhin khualzahawm niin a hmanpui. 

Pu John Siamkunga chuan Government Hnahthial College-in kum reilote chhungin nasa takin hma a sawn a ni tiin theihtawp chhuaha thawktute college staff leh khawtlang hruaitute chungah lawmthu a sawi a. Hmasawn zel tur chuan khawpui liana college-te tlawh a tul thu sawiin, kum thar lamah zirlai naupangten exposure/excursion an neih theihna tur ngaihtuahpui a tum thu a sawi a. Zirlai naupangte chu theihtawp chhuaha zir tura chahin hnamdang te nen kan inbeihna hi thluak a ni tawh tiin central service hrang hrang a inziak tling thei tura tan la turin a chah a. Govt. Hnahthial College Building, Hostel Building leh ram tha tak an neihte  uluk taka humhalh chhunzawm zel turin a chah bawk. 

He huna khualzahawm Jeje Lalpekhlua pawhin fuihna thu sawiin theih tawp chhuah hi hlawhtlinna bul a ni a, beidawn chang leh harsatna thlen chang a awm lo thei lo tiin chung hunah pawh chuan beidawng mai lova, theih tawp chhuah thar thin turin zirlaite a chah a.

Ruihtheih thil chi hrang hrang laka fihlim tura chahin zirlaite chu an thlen chin duh tawk mai lova hmalam pana kal zela ram leh hnam dinhmun siamtha tura rilru siam turin a fuih a ni. 

Government Hnahthial College-ah hian Department 7 awmin, zirlai naupang 120 an awm a, teaching Staff 26 leh non teaching staff 12 awmin, ram bigha 268.87 a zau an nei a, tun tumah hian Graduate thar 12 awmin Citation hlan an nih bakah department tina titha ber te cash award hlan an ni bawk.