2441/2025-2026

Lunglei, 2025 Sahmulphah thla ni 28: Khadi and Village Industries Commission (KVIC), State Office Aizawl chuan vawiin khan Government J. Buana College, Lungleiah zilaite leh zirtirtute tan Prime Minister’s Employment Generation Programme (PMEGP) chungchang zir hona, District Level Awareness Programme an buatsaih a. He hun hi ṭhalaite mahnia sumdawnna bul ṭan thei tura fuihna leh zirtirna bakah, khua leh tuite'n ei zawnna ngelnghet an neih theih nana India sawrkar ruahmanna hrang hrang inzirtirna atana buatsaih a ni.

KVIC Executive pahnih - Pu Safiyan Hayath leh Pu Nilimesh Sarkar te chuan PMEGP scheme chungchang a lem nen chipchiar takin an sawi fiah a. Scheme-in a tum te, a dil theite leh a dil dan, hamṭhatna awm leh PMEGP loan hmanga sumdawnna (industry) din theih hrang hrangte an zirtir a. Mahni kutkawiha ei zawn pawimawhna leh hlutna te, mi hlawhtlingte chanchin hrang hrangte tar langin, sumdawnna bul ṭan dan, project report siam dan leh bank dawr dan chungchangah te zawhna leh chhanna leh sawi hona hun hman a ni bawk.

Government J. Buana College Principal Pi Lalthangmawii Chhangte pawhin thu sawiin, KVIC te'n an College-a awareness programme ṭha tak an buatsaih chu lawmawm an tih thu a sawi.

KVIC Aizawl hian Mizoram hmun hrang hrangah ṭhalaite'n mahni kutkawiha sumdawnna bul ṭan dan an thiam a, mahni intodelh tur leh ei zawnna ngelnghet an neih theih nan PMEGP awareness leh entrepreneurship development programme hrang hrang an buatsaih ṭhin a ni.