No.7957/2020-2021

Aizawl, the 30th March, 2021 : Vawiin khan ICT Department bultumin Government Website Excellence Award, 2020 sem a ni a. ICT Minister Pu Robert Romawia Royte chu khuallian a ni a, Government Website Excellence Award, 2020 semna hi SAD Conference Hall, MINECO-ah neih a ni.

Government Website Excellence Award, 2020 dawngtute:

1. Department of Information & Public Relations
2. Department of Personnel & Administrative Reforms
3. Department of Health & Family Welfare

Lawmman pakhatna hian Rs 2,00,000/-, pahnihna hian Rs 1,00,000/- leh pathumna hian Rs 50,000/- bakah lawmpuina certificate a keng tel theuh a ni.

Minister chuan nasa leh zuala sawrkar department ten mipui tana service an pekchhuah te pho chhuak a, mipuiten tangkai zawka sawrkar website enkawl a nih nan he award hi siam a ni, a ti a. Cash award dawngtute hian an website tih changtlun nan hmang se, midangte chochhuah nana hmanrua tangkai a nih a beisei thu a sawi a. ICT Department chu department pawimawh tak, sawrkar in allocation of business a chhuahah pawh department engmahin a malmak theih ngawt a ni lo, a ti a. Thawktu mi 45 vel awmin, hma tamtak lak a ni tiin a sawi a. Chung zingah chuan Mizoram Telecom Infrastructure Policy, 2020 neih a ni a, he policy thar hian telecom service providers ten Mizoram chhunga hna an thawh dantur leh kalphung mumal an neih dan tur te a keng tel dawn a ni tiin a sawi.

ICT Department hian tun dinhmunah sawrkar, institution, society website 336 a host mek a, website atana mamawh domain, hosting leh CMS te manlo in a pe (provide) mek a, sawrkar department ten anmahni website tha taka an enkawl theih nan training hi a kalpui mek bawk a, 2016-18 chhungin sawrkar department website te quarterly assessment leh evaluation a nei thin a, secretaries meeting-ah thehlutin, review neih thin a ni a. Sawrkar chuan hemi engah hian department ten an website tha zawka an enkawl a, inelna tha tak neih beiseiin Government Website Excellence Award, 2020 hi a buatsaih a ni. He award atan hian sawrkar department website 45 endik an ni a, ICT Department website erawh chu a buatsaihtu department an nih avangin telh a ni lo a ni.

Award dawngtur thlanna atan hian Committee pahnih Technical Evaluation Committee leh Selection Committee din a ni a, Technical Evaluation Committee hi Chief Informatics Officer, ICT chairman-na hnuaiah din a ni a, member te chu- IT, Department, MZU; NIC, Mizoram, NIELIT, Mizoram te an ni a. He committee hian tehfung hrang hrang - mipui tan an website content a pawimawh dan te, data a dik tawk leh tawkloh te, content an update that leh thatloh te, layout hmuh nuamin a awm leh awmloh te, link tha lo leh blank a awm em tih te bakah content tam dan a zira mark an pek chu Selection Committee ah thehluh a ni a, Selection Committee hi ICT Minister chairman na hnuaiah din a ni. Pakhatna hian mark 120 atangin mark 100 a hmu a, pahnihna hian mark 98 a hmu a, pathumna hian mark 97 a hmu a ni.