485/2023-2024

Aizawl, the 18th May 2023: Vawiin khan Auditorium, MZu-ah Governor Dr. Hari Babu Kambhampati, MZU Chief Rector ni bawk chuan Mizoram University (MZU)-a Dept. of Physics leh Mizoram Science Centre, Directorate Of Science & Technology, GoM te tangkawpin dt. 18th-19t chhung awh tur Two-day International Symposium on the History of Astronomy of the Mizo People' an buatsaih chu khuallian niin a hawng a. He International Symposium-ah hian Keynote Speaker atan Dr. Martin George, Principal Astronomer, Hive Planetarium, Tasmania, Australia and Chair of International Development, International Planetarium Society chuan sawm anih angin a hmanpui bawk.

Symposium hawngtu Governor Dr. Hari Babu Kambhampati chuan arsite chanchin hian mihringte nunah hmun lairil tak an luah a, hmakhawsang atang tawhin khawvel hmun hrang hranga chengten an hnam mil ang zelin arsite thawnthu an nei tawh thin a. Van pakhat hnuaia cheng kan nih angin Arsi chungchanga kan thil hriat zirna leh chhinchhiahna bakah thawnthu te a ngaihnawmin a bengvar thlak thin hle a ti. India ram mi te ngei pawh hian mithiam Aryabhatta hung atang tawhin thuk takin an nun nen inzawmna neiin an lo ngai tawh thin a ti a. Hetiang ang hnam ziarang nen inzawm tlat thilhlui ngaihhlutna hi lo tlahniam zelin, thangtharte hian vawnthatn kawngah hmalak reng a ngai a ni a ti bawk. Mizo Pi leh Puten arsi an lo hriat dan te vawnhim anih theih nan a hmalatu Physics Dept., MZU leh Mizoram Science Centre te chu fakawm a tihthu a sawi. Science Centre chu theih tawp chhuah a tan la chhunzawm zel tura chahin thangthar te zingah Arsi chanchin leh Van thengreng chanchin zir chakna tuh tura hma la zel turin a chah a ni. Governor chuan tunlai thangtharte chu digital media leh internet hmangin thil thar chi hrang hrangin an nun a deng mek a, hetih lai hian mahni hnambil ziarang leh pawmdante vawnthata hlanchhawn anih zel theihna turin upa zawk te leh zirtirtu ten mawh an phur a, tan an lak a ngai tih a sawi bawk.

Full Speech of Governor: https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-international-symposium-on-history-of-astronomy-of-the-mizo-people-organized-by-department-of-physics-mizoram-university-directorate-of-science-technology-government-of-mizor

Symposium hawnna inkhawmah hian Dr. Martin George, Australia pawhin thusawiin arsite leh vansang lam chanchin chu mi zawng zawng huapzo anih thu leh mihringte thinlung nen inhnaih tak a nih thu a sawi a. Symposium buatsaihtute chu astronomy leh space science thehdarhna kawnga hmalatu pawimawh tak an ni a ti bawk. Hawnna inkhawm hi Prof. Zaithanzauva Pachuau, HOD Physics Dept., MZU chuan kaihhruaiin Khualzahawm Prof. Pravakar Rath, MZU Acting Vice Chancellor, Prof. Diwakar Tiwari, Dean SPS, leh Er. H. Lalsawmliana, CSO, DST ten thu an sawi bawk a ni.

Ni hnih awh tur he Symposium-ah hian Mizoram chhung leh pawn atangin mithiam thlanbik ten technical session vawi 4 neiin thupui zirna leh sawihona hun an hmang dawn a. Dr. Martin George pawhin zirlaite hmaah astronomy thchlarna turin thupui a sawi bawk ang. Symposium hi Mizoram Science Centre Berawtlangah chhunzawm a ni anga. Dr. Martin George kawmna leh Planetarium tlawhnate neih a ni bawk dawn a ni.