1226/2024-2025
Aizawl, the 19th July, 2024: Governor Dr Hari Babu Kambhampati chuan hun reilotea thawh zawh beisei,  Bairabi – Sairang New Line Project (51.38 Km) chungchangah Northeast Frontier Railway (NFR) Engineer-te Raj Bhavan-ah review  meeting a neih pui.
NFR aiawhin Pu Vinod Kumar, Chief Engineer, NFR (Construction) leh  a thachhang dawltu, Pu Harjimal Meena, Dy CE, NFR, Aizawl te chuan Aizawl kawtkaia  bungrua leh passenger service thlen tur, rel kawng siam mekah  hmasawnna an neih te Powerpoint Presentation hmangin an sawifiah a. He hunah  Mipui tana Rail Service a him na turin Relkawng siamna bungrua te labo lo turin ngenna an siam nawn leh a. Rail a rawn luh hunah Relkawng in a tan tlang mipuite chu Rel tlan hun chhunga Relkawng kan lo tur leh hnaih lo tura fimkhur turin an chah bawk.
Governor Dr Hari Babu Kambhampati chuan ngun taka presentation a thlir hnuah Mizoram state hmasawnna atana transportation service pawimawh bera ngaih, rel kawng tha tak siam saktu  Central Sorkar leh Indian Railways te chungah lawmthu a sawi a. Governor chuan Rel hian Mizoram  leh a ṭhenawm state Assam inkara zin hun a tihtlem bakah, passenger leh bungraw phurh senso nasa taka a tihtlem tur thu a sawi a.  Darkar 3 atanga darkar 4 vel laiin Mizoram leh Assam inkara zin hun a pawt tawi dawn niin a sawi. Rel hmanga bungraw phurh man nasa taka  a hniam dawn avangin Mizoram tan kawng tam takah hmasawnna dang a thlen tur thu a sawi. Governor chuan Mizorama Entrepreneur-te chu Rel in a ken tel sumdawnna liantham tak tak a awm dawn avanga lo inpuahchah tha turin a chah nghal bawk a ni. 
Report-a tarlan angin, project senso hi ennawn a nih hnuiin  Rs 8213.72 Crores a ni a, tun dinhmunah hian physical works 93% chu zawhfel a ni tawh. He Rel kawngah hian Station pali a awm a, chungte chu Hortoki, Kawnpui, Mualkhang, leh Sairang te an ni. Bairabi leh Sairang inkar line thar 51.38 Km chu section paliah then a ni a, chungte chu - Bairabi – Hortoki, Hortoki – Kawnpui, Kawnpui – Mualkhang, leh Mualkhang – Sairang te an ni.
NFR-in Bairabi – Hortoki section-a trial run hlawhtling tak a lo neih tawh avangin, Hortoki Station hi tun thla chhunga hawn tum niin  Mizoramah  Hortoki thleng rel a rawn luh tawh dawn a.  Kuminah tho hian   Hortoki – Kawnpui section leh Kawnpui – Mualkhang section te pawh relin a zawh thei dawn a. Kum 2025 July thla chhungin  NFR chuan Sairang Terminal Station hawn a tum a bawk a ni.

Attachment

  • Loading attachment...