885/2024-2025

Aizawl, the 21st June, 2024: Tukin zing kar khan Khawvel ram dangte rualin Aizawla Yoga tuipuitute chuan Hawla Indoor Stadium-a International Day of Yoga vawi 10-na lawmna ahuhoin an hmang. He hun hi Governor Dr Hari Babu Kambhampati chuan Khuallian niin a hmanpui a. Chief Secretary Dr Renu Sharma  chu khualzahawm a nithung a. Kumin International Day of Yoga-ah hian thupui atan,”Yoga for self and society” hman a ni.

Governor chuan India ram atanga Yoga rawn pianchhuah dan te, tunah chuan khawvel pumpuiah mi tam takin tuipui mekin  nitin an taksa sawizawina an hman thin thu a sawi a. Yoga hmanga taksa insawizawi chu  hriselna a nih bakah ram leh khawtlang hrisel zawk siam kan tumna kawngah te pawh  hmalakna pawimawh a nih thu te a sawi. Mizoramah pawh Yoga tuipuitute an pung zel chu lawmawm a tih thu a sawi a, Mizoram hmelhmang mawi tak leh boruak thianghlim tak chu Yoga hmanga insawizawina atan hmun duhthusam a ni a ti a. Yoga thatna leh tangkaina mi tamzawk ten an lo hriat pawh theih turin Directorate of Ayush a thawk te pawh tan la zel turin a fuih.

Full Speech of Governor Dr Hari Babu Kambhampati :https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-10th-international-day-of-yoga-at-hawla-indoor-stadium-republic-vengthlang-aizawl-on-21st-june-2024

He huna thusawitu dang, Chief Secretary Dr Renu Sharma chuan NCC Cadets leh kalkhawmte hnenah tunlai khawvel, hmasawnna leh kawng engkima intlansiaknaah hian rilru leh taksa hriselna atana tha lo te kan nitin nunah kan tawng thin a. Hetiang hunah hian kan taksa leh rilru hriselna ngaihpawimawh hi ka thlahthlam tur a ni lo a, hriselna atan kan tih theih awlsam tak leh hautak lo, khawi hmunah pawh ka tih theih chu Yoga hmanga insawizawina hi a ni a ti.

Yoga Day pual program hi  Dr. Vanlalsawma Principal Director, Health & Family Welfare Department chuan inlawmthu sawiin a  tan. Khuallian leh Khualzahawmte thusawi zawhah Common Yoga Protocol neih niin Governor Dr Hari Babu Kambhampati, Lady Governor Dr Jayashree Kambhampati, Chief Secretary leh Yoga tuipuite chuan Common Yoga Protocol insawizawina an nei ho a ni.

He Yoga Protocol-ah hian Ministry of AYUSH atanga yoga instructor hma hruaiin yoga exercise a tel te chu  Asana hrang hrang an neih pui a. He hunah hian  Yoga tuipuitute bakah hian NER Directorate leh Group HQ Silchar kaihhruaina Mizo Bn 1, Mizo Air SQN 1 leh Mizo Bn NCC 20-a NCC cadet-te bakah an Commanding Officer leh Instructor-te pawh an tel a ni.

Common Yoga Protocol segment neih zawhah NCC unit hrang hranga Commanding Officer-te chuan Governor Dr Hari Babu Kambhampati leh Lady Governor Dr Jayashree Kambhampati, Chief Secretary Smt Renu Sharma leh Director leh official dangte hnenah ngaihhruina thilpek an hlan a. Governor Dr Hari Babu Kambhampati pawhin Yoga instructor leh special invitee dangte hnenah thilpek a hlan bawk.

Report a tarlan dan chuan  AYUSH Directorate hnuaiah Yoga Instructor 12 (Sawm leh pahnih) an awm mek a, chungte chu District Hospital 8 (Pariat)-ah te, Civil Hospital Aizawl-ah te, Integrated AYUSH Hospital Thenzawl-ah te, Administrative Training Institute (ATI)-ah te dah an ni.

Programme hi Pi Sangchin Chinzah, Secretary, H&FW, Mizoram chuan lawmthu a khar a ni.