2028/2023-2024

Aizawl, 27th September 2023: Vawiin khan Assam Rifles Ground of Aizawl-ah Project “Sentinel” – Centre of Educational Excellence, Skilling and Wellness chungchangah thawhhona thuthlung - Memorandum Of Understandings chu Assam Rifles, NIEDO leh Axis Bank ten an ziak a. Governor Dr Hari Babu Kambhampati chuan he hun hi a hman pui a ni.

Project Sentinel hi Assam Rifles leh NIEDO tangkawpin Mizoram rama thalai(zirlaite) hmakhua ngaiin zirna tha zawk an zir theihna tur leh state danga zirna in tha zawka lehkha an zir theih na atan hmalakna an kalpui tur a ni.

MOU hi 23 Sector Assam Rifles, National Integrity & Educational Development Organisation (NIEDO) leh Axis Bank aiawh te chuan Governor Dr Hari Babu Kambhampati leh Maj Gen VK Nambiar, YSM, SM, IGAR (East) uapna hnuaiah an ziak a. MOU ah hian Pu Abhejit Agarwal, Senior, Vice President & Head, Sustainability and CSR, Axis Bank, Dr Rohit Srivastava, Chairman, NIEDO leh Brig Girish Upadhya SM, VSM, DIG 23 Sector Assam Rifles te an hming an ziak a ni.

Governor Dr. Hari Babu Kambhampati chuan Axis Bank leh NIEDO te’n Assam Rifles thahnem ngaihna an tawmpui a, Mizo thalai te hmakhua ti eng tura an rawn pen chhuak chu Mizoram mipui leh a bikin zirlaite aiawhin lawmthu a sawi hmasa a. Project Sentinel hian Mizo zirlai thluak tha tak tak te chu sang leh zualah a vawrh dawn a, kan zirlai ten tun atanga kum 2 a lo ral chuan hlawhtlinna lian tham tak tak an rawn nei nual dawn a ni a ti. Governor chuan zirlai thluak tha tak tak, chhungkaw sum dinhmun in a zirloh avanga an thlen tur thleng thei ta lo an awm thin a. Project Sentinel hnuaiah hian heng zirlai chhawmdawl ngai te tan hian remchanna duhawm tak a lo in her chhuak dawn a. Vawiina he thawhhona hi Mizoram tana zirna huanga Mellung pawimawh tak a ni a ti.

Full Speech of Governor: : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-signing-of-mou-on-project-sentinel-centre-of-educational-excellence-skilling-and-wellness-at-2-assam-rifles-football-ground-on-27th-september-2023

Project Sentinel hi Full-time residential program a ni a. He project hnuaiah hian hmeichhe naupang leh mipa naupang 30 thlan chhuah te chu thla 12 chhung atan Engineering leh Medical entrance exam hrang hrang bakah competitive entrance exam-ah allied stream te te telin kaihhruaina uluk takin pek an ni dawn a. A tirah chuan zirlai, science stream hmanga class 12 clear tawh, JEE leh NEET atana inbuatsaih mekte chu ngaih pawimawh hmasak an ni ang a. Hemi hnuah stream dang te pawh hrut chhoh zel a ni dawn.

He thla 12 chhung hian competitive exam huangah inkaihhruaina, mithiam te ruaiin, uluk takin Assam Rifles ten NIEDO leh Axis Bank te nena tangkawpin Assam Rifles Complex, Zokhawsangah an kalpui dawn a ni.

He program hnuaiah hian zirlaite chu soft skills, personality development, critical life competencies, leadership capabilities, personal conditioning, wellness programs, vocational training leh a dang te zirtirna pek a ni dawn a. Zirlai te thlan dan torah hian NIEDO official te chu Mizoram hmun hrang hrangah kal kualin sikul an tlawh chhuak vek dawn a ni.

MOU ziahna hun hi  Brigadier Girish Upadhya, SM, VSM, DIG, HQ 23 Sector Assam Rifles chuan inlawmna thu sawiin tan a ni a. Project chungchang leh a kalpui dan tur chungchangah Maj Gen VK Nambiar, YSM, SM, IGAR (East) chuan thu a sawi bawk a. Thusawitu dangte chu Dr. Rohit Srivastava, CEO, NIEDO leh Pu Rudrapriyo Ray, Advisor, IMO & Sustainability, Axis Bank te an ni.