1497/2024-2025

Aizawl, the 8th August 2024: Vawiin khan Raj Bhavan-ah  Governor Dr Hari Babu Kambhampati chuan Kum 2023 March 28 a Fisheries Department nena meeting an lo neih tawh atanga tun thlenga Fisheries Department hmalakna thlirletna bakah  central Schemes leh Bank kaltlanga Sangha Vulhtute tanpui dan tur sawihona a neihpui.

He meeting-ah hian Mizoram Rural Bank, State Bank of India, Mizoram, leh Mizoram Cooperative Apex Bank hotute pawh Sangha vulhtute nena bank inthlunzawm leh thawhho a pawimawhzia sawipui tura sawm an nih angin an tel a ni.

Thuhmahruai neiin Governor Dr Hari Babu Kambhampati chuan Sangha Vulh bikah hian kan state-in intodelh theihna a nei sang hle tih a sawi hma sa a.  State sum dinhmunin a zir loh avanga Fisheries Department in Budget a nei lian thei lo tih sawiin heti chung hian Central sponsored scheme tam tak, Sangha Vulhtute dawmkanna leh tihhmasawnna tur erawh a awm teuh a ni a ti. Mizoram in  Sangha thar chhuah tihpun, kan eikhawp tharchhuah leh hralh chhuak thei tur khawpa tam thar thei tur chuan Fisheries Department in nasa takin tan a lak a, project tam zawk Central Sawrkarah a thehluh zung zung a ngai a ni a ti.

Central Schemes hnuai atangin Subsidy Sangha Vulhtuten a lo dawn te belhchhah turin Sangha Vulhtuten Bank Loan an mamawh belh thin tih a sawi a. Sangha vulhtute zingah loan la duh lo an awm thin chu zirchian a tul niin a sawi. Bank loan chungchang te leh a rulh dan kalphung te chiangkuang taka an hriatloh vang te thil ni thei a nih avangin hemi chungchangah hian Fisheries Department leh Bank lam te pawh thawkhoin tan an lak a tul tih a sawi bawk a ni.

Fisheries Department aiawhin Pu H.Lalengmawia, Commissioner & Secretary chuan tunhnaia Fisheries Department hmalakna te, hlawhtlinna te, Ministry-a rawtna thehluh zat te, hmalak dan tur leh ruahmanna en neih mekte a sawi a. Hemi hnu hian Fisheries Department, Sawrkar hnuaia hmalakna hrang hrang te chu PowerPoint hmangin Director Pi Laltleipuii leh a thawhpui officer-te’n an tarlang a ni.

Tunah hian Fisheries Department chua Mizoram chhunga Hectare 24000 chu Sangha dil siam theihna niin an chhuta, heng zingah hian Hectare 4000 chuang velah Sangha Vulhtuten hma an la mek a ni. Ram pum huap anga chhutin mi pakhatin Kum khat chhungin  sangha Kg 11 atanga Kg 13 inkar vel a ei tlang pui a.  Mizoramah chuan kum khat chhungin mi tan zel Kg 6.4 chauh a la thar chhuak thei a, a tam zawk chu pawn lam atanga lakluh a la ni mek a ni.

Presentation neih zawhah hian Banker-te nen Fish Farmer-te tana loan pek chhuah chungchang sawiho a ni a. Hemi chungchangah hian Commissioner & Secretary, Fisheries Department chairman-na hnuaiah Banker te leh Fisheries Department te meeting neih thin rawt a ni.

Bank lam aiawh hian Pi Sheryl L Vanchhawng, Chairman, MRB, Pu C.Ramdinsanga, GM, MRB, Pu A.Lallungmuana, CEO, MCAB, Pu JC Lalhrilhmawia, AGM, MCAB, Pu Lunkhomang Singsit, CM(Credit), SBI leh Pu Lalphanlo Tusing, CM(SLBC), SBI Mizoram te chu meeting-ah hian an tel a ni.