No.4388/2021-2022

Aizawl, the 24th March 2022: Governor Hari Babu Kambhampati hovin vawiin khan Durbar Hall, Raj Bhavan-ah Mizoram Rajya Sainik Board (MRSB) thutkhawm vawi 17-na neih a ni a. He hunah hian Chief Minister Pu Zoramthanga pawh Vice President a nihna angin a tel a ni. MRSB meeting hi kumtin vawi 1 neih tur a nih lain hrileng vangin kum 3 chhung chu neih a ni lova. Meeting hnuhnung ber chu kum 2018 September 5 khan neih niin MRSB meeting apiang hian Ex-Servicemen te leh an chhungte puala hamthatna ennawn ngai te sawiho a ni thin a ni.

President leh meeting chairman a nihna angin Governor Hari Babu Kambhampati chuan member te a lo lawm a. Thuhmahruaiah Meeting hnuhnung ber leh vawiina meeting inkara hlawhtlinna thenkhat te a sawi lang a ni. Governor chuan World War II Veteran leh World War II a tang thin, sipai in a thihsan hmeithai in chhawmdawlna a dawn chu Rs.1200 & Rs.1000 atangin Rs.2400 & Rs.2000 ah Mizoram sawrkarin a tih san sak tawh tih a sawi a. Tunah hian hetianga chhawmdawlna dawngtu veteran 33 leh hmeithai 369 an awm mek tih a sawi lang bawk. 2nd Assam Regiment thiah a nih taka sipai lo tang thin, tuna taksa lama rual ban ta lo mi 6 te pawh chhawmdawl chhunzawm niin Rs.1200 an dawn thin chu Rs 2400 tihsan sak a ni tih a sawi a. Rs 2,25,500/- chu 55 Ex-Servicemen leh sipai in a thihsan hmeithai te damdawi in a inenkawlna atan hman a ni a. Ex-Servicemen leh sipai in a thihsan hmeithai 9 te chu vanduaina an tawh avangin tanpui an ni a, he tanpuina atan hian Rs 92,000/- pekchhuah a ni a ti. Operation Rakshak neihna a Sipai huaisen leh chawimawi phu mi pahnih Subedar K Laldingliana leh Havildar Laltlanzova te chuan Sena Medal an dawng a. Hei sawrkarin a chhuang em em a, lawmpuina atan Rs. 3,00,000 pek an ni a ti a. Ex-servicemen re-union pawh hlawhtling takin AR Ground-ah neih a lo ni tawh a ni a ti.

Kum 2018 September 5 a meeting neih tuma thurel bawhzuina chungchang leh state sawrkarin a hmalakna te Chief Minister Pu Zoramthanga chuan a chhang hmasa a. Hemi hnu hian kumin MRSB Meeting a rel tur Agenda te chu chhawpchhuah a, sawiho chhunzawm a ni. Vawiin a MRSB Meeting-ah hian Ex-Servicesmen Contributory Healthcare Schemes rate for NE States/Mizoram tihsan, Ramri venna thawkmetu pui tura Ex-Servicemen Battalion din rawtna, hnaruak hnawhkhah leh post thar siam belh chungchang, Sainik Rest House sak belh chungchang, Sainik Office Building sakna tur hmunhma ngaihtuah chungchang, Ex-Servicemen te puala NCC Office a hnathawh tur hauh sak chungchang, War Memorial hmundanga sawn chungchang leh thil pawimawh dang te sawiho a ni.

Ex-Servicemen leh an chhungte hamthatna ngaihtuah chungchanga State mawhphurhna te Chief Minister Pu Zoramthanga chuan a sawi a. Hripui leng karah state sawrkar mai nilo, Central Sawrkar pawhin namenloin sum lamah harsatna an tawk mek a. Heti chung hian Mizoram sawrkar chuan Ex-Servicemen leh an chhungte hamthatna hi a ngai pawimawh em em a; a theih ang angin mamawh zinga a tul zual deuh te chu tih hlawhtlin sak a duh a ni a ti. Chief Minister Pu Zoramthanga chuan MRSB Meeting a sawi vek sen loh te chu Sainik Welfare & Resettlement Department hotuten a hnenah rawn thlen thin se tha a tih thu a sawi bawk a ni. Mizoramah Ex-servicemen tam tak, mifel tak tak an awm teuh tih a hriat thu te, sawrkar hna an thawh awm chiah an luh theihna tur pawhin sawrkarin ngaihtuahna a sen thu a sawi a. Mizoram ramri venhimna atan Mizo an that ber thu sawiin hemi chungchang hi Union Home Minister pawh a sawipui tawh a. Union Home Minister hnenah hian Mizorama Ex-Servicemen te chu Myanmar leh Bangladesh hrula ramri venna puihtu atan Battalion 2 talah siam ni se tiin ngenna a siam tawh tih a sawi bawk a ni.

Central Sawrkar aiawhin meeting a rawtna chungchangah leh zawhna awm te chu Maj General Pawalpal Singh, GOC, 41 Sub Area leh Brig Vinod S, SM, VSM, Director, Resettlement Zone(east), Kolkata ten an chhang a. Anni hian Ex-Servicemen te hamthatna chungchangah Mizoram sawrkar chu thil phal tur leh hnaruak hnawhkhah tur a awm chang pawha Ex-Servicemen leh an chhungte duhsak tura inkaihhruaina Central Sawrkarin a siam te tawmpui turin ngenna an siam bawk a ni.

MRSB hian member 31 an awm a; he committee-ah hian Governor chu president a ni a,Chief Minister, GOC-in-C, Eastern Command, AOC-in-C, Eastern Command, Secretary, Deptt of Ex-Servicemen Welfare, MOD leh Chief Secretary te chu Vice President an ni. Vawiin meeting-ah hian Home Minister Pu Lalchamliana, Chief Secretary Dr Renu Sharma, Pu Devesh Chandra Srivastava, DGP, Pu H.Lalengmawia, Home Commissioner & Secretary, Pu K.Lalthawmmawia, Secretary, DP&AR, Brig Digvijay Singh, SM, Sector Commander, 23 AR, High Official thenkhat te leh Ex-Servicemen hruaitute chhu member an nih angin an tel a, sawmbik mi pawimawh te pawh an tel bawk a ni.

MRSB meeting zawh hian Governor hovin member 12 awmna Mizoram State Managing Committee on Amalgamated Special Fund for Reconstruction & Rehabilitation of Ex-Servicemen chu an thukhawm chhunzawm leh nghal a ni.