4013/2023-2024

Aizawl, the 29th February 2024: Vawiin chawhma khan Durbar Hall, Raj Bhavan-ah Governor Hari Babu Kambhampati chuan Pi PB Lianthangpuii MIS(rtd) chu Member, Mizoram Public Service Commission (MPSC) atan rinawmna thu tiam tirin a lalut. MPSC member atana hmeichhe ruat pahnihna a ni.

MPSC member thar lakluhna hi Pu H.Lalengmawia, Home Commissioner leh Chief Secretary charge la mek chuan kaihruaiin he hunah hian Member, MPSC atana Pi PB Lianthangpuii MIS(rtd) ruat a nihna lehkha a chhiar chhuak a. Hemi zawhah hian Governor Hari Babu Kambhampati chuan Pi PB Lianthangpuii MIS(rtd) chu rinawmna thu tiam tirin Member, MPSC atan a la lut a ni.

MPSC member thar lakluhna hunah hian Chief Minister Pu Lalduhoma a tel a. Speaker Pu Lalbiakzama, Lok Ayukta Chairman Pu C.Lalsawta , Sawrkar mi pawimawh te leh sawmbik mi thenkhat te an tel a ni.

Pi PB Lianthangpuii MIS hi January 11, 1964 khan Dawrpui Vengtharah a piang a. A nu leh pa te chu P.Lalzuala (L) leh Pi Lalawii te an ni. A pasal Dr ST Lalruatfela MS( Gen Surgery) nen fapa 2 leh fanu 2 an nei a; Dawrpui Vengtharah an cheng mek a ni.

Pi PB Lianthangpuii hi thiamna lamah chuan M.A. Pol.Sc.degree nei a ni a. Amah hi zirna lamah a tluang hle a, kum 1981 MBSE HSLC Exam-ah khan 14th Ranked hauh in English leh Social Studies subjects ah te Mark hmusang ber a ni. Class 12 atanga BA thleng  Loreto College, Darjeeling-ah a kal a. MA chu Pune University atangin kum 1988 khan a rawn zo thung.School leh College ah te zirtirtu hna a thawh hnuiin kum 1989 khan Mizoram Information  Service –ah  a lut a. A  thawhna I&PR  department huanga mawhphurhna pawimawh tak tak te a chelh thin a, PRO to Governor hna te, sawrkar flagship program a Media Cell enkawl hna te a thawh hnuiin kum 2024 January 31 khan Joint Director, I&PR atangin a pension a ni.