3973/2022-2023

Aizawl, the 24th March 2023:  Vawiin kha World TB Day a ni a.  Khawvel hmun dang te rualin he hun hi Mizoramah pawh hman a ni. World TB Day 2023 puala Program hi Conference Hall,  Assembly Annexe-ah hman a ni a. Governor Hari Babu Kambhampati chuan Khuallian niin he hun hi a hmanpui a. Kuminah hian World TB Day thupui atan, " Yes! We can end TB!", tih hman a ni.

Vawiin chawhma lamah khan Varanasi khawpuiah World TB Day pual hian - Khawvel pum huap intawhkhawmna - One World TB Summit neih a ni a. He hunah hian Prime Minister Narendra Modi chuan TB natna umbo kawnga hmalakna pawimawh tak tak a hawng a. Governor Hari Babu Kambhampati pawh, Video Conference kaltlangin One World TB Summit-ah hian a tel a ni. 

World TB Day program, Assembly Annexe Conference Hall a neihah hian Governor Hari Babu Kambhampati chuan TB natna vei te inenkawlna atana Chawtha(nutrition) thawhtute - Nikshay te chawimawina a nei hmasa a. Hemi hnu hian World TB Day puala thuchah sawiin TB natna Mizoram atanga um bo a nih theih nan ngenna a siam a ni.

Governor chuan Kum 2030 ah khawvelah TB natna nuaibo tumin Khawvela ram zawng zawngin intiamkamna an nei tih a sawi a. Hetih lai hian, Prime Minister Narendra Modi kaihruaina hnuaiah India ramah Kum 2025 a ral hmain TB natna tih rem kan tum a ni a ti. TB natna umbo tura PM TB Mukt Bharat Abhiyaan hmalakna a sawifiah chhunzawm a. He hmalakna hi a danglam hle a, Sawrkar leh khua leh tui zawng zawngte thawhhona a ni a ti a. He hmalaknaah hian Sawrkar atanga TB natna vei enkawlna te chu mi thahnemngai leh mi thilphal ten thilpek hmanga an thlawp theihna tur, Nikshay Mitra program chhawp a ni a ti. Nikshay Mitra program hnuaiah hian TB natna vei te mamawh em em, chawtha(nutrition) thlakhat a damlo pakhat tan Rs 650/ chhutin a thawh theih a. TB vei te tanpui duhtu tute chu  https://reports.nikshay.in/FormIO/DonorRegistration ah an in ziak lut thei reng a ni a ti. Governor chuan tunah hian TB vei 2000 chuang Mizoramah an awm mek a, TB vei te tana chawtha leina thawhtu - Nikshay erawh mi 72 chiah an la awm mek a ti.

Governor chuan Mizoramah PM TB Mukh Bharat Abhiyan chu Raj Bhavan-ah September 19, 2022 khan Mizorama kalpui turin a hawng tih a sawi a. A bul tanna atan TB vei 20 te Nikshay Mitra kaltlangin a chhawmdawl tih a sawi a. Hemi hnua hian Health Minister leh a thawhpui Minister leh MLA thenkhatte, ADC hotute leh mimal thahnem ngai te pawhin he rawngbawlna hi an rawn zawm a. "TB vei te tana chawtha thawhtute chungah lawmthu sawiin midang tam tak he rawngbawlnaah hian an rawn tel duh ka ring a. Chung mi te chu rawn penchhuak turin ka sawm a. Mimal chauh ni lovin Mizoramah chuan tlawmngaipawl lian tak tak leh thawk tha tak an awm a. Heng YMA, MHIP, MUP, zirlai pawl te hi rawn tel turin ka sawm a. Kohhran hruaitute pawh he hmalakna thlawp turin ka sawm a ni", a ti. Full speech of Governor: https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-world-tb-day-2023-at-conference-hall-assembly-annexe-on-24th-march-2023

Governor chuan Health Department in TB natna umbo tura theihtawp a chhuah chu chhuanawm a ti a. Kum 2025 ral hmaa TB natna awmlohna state ni thei tur leh ni hmasa ber turin duhsakna a hlan a ni. Hei hi tihhlawhtlin a nih chuan natna khirh Aids, Cancer, etc.. huanga hmalakna te pawh a chak sawtin a rinawm tih a sawi bawk a ni. 

National TB Elimination Program (NTEP) huanga Kum 8 hmalakna te tarlan a ni a. Tehfung thenkhatah hmasawnna hmuhtur a awm laiin tanlakna tur a la awm bawk a ni. Kum 2022 statistics ah chuan Mizoramah TB vei 2081 hmuhchhuah a ni a. Heng natna veitute hi enkawl dam ni tlangpuiin TB enkawlna dawngtute hlawhtlinna hi Kum 2015 atang khan 85% chunglam ni char charin Kum 2022 khan 87% a ni. TB vei zingah multi-drug resistance (MDR) case 117 enkawl mek a ni a. Kum 2022 khan MDR case enkawl zinga 73% a hlawhtling a. TB thihpuitu zat erawh Kum 8 chhungin  tlem lam a la pan meuh lo a, Kum 2022 khan mi 74 he natna avang hian an thi a ni.

World TB Day Program hi Pi  Esther Lal Ruatkimi, Principal Secretary, H&FW Dept chuan inlawmna thu sawiin tan a ni a. Dr. Vanlalfela, State TB Officer hnen atangin NTEP Achievement Report of Mizoram state ngaihthlak a ni. Hemi hnu hian TB vei dam chhuak lam atangin thusawi ngaihthlak a ni a. Program hi  Dr. Eric Zomawia, Mission Director NHM chuan lawmthu sawiin a khar a ni.