152/2022-2023
Aizawl, the 13th April 2022: Zokhawthar Land Custom Station (LCS) kaltlanga ramri insumdawn tawnna chu hun engemaw chen a chawl titih tawh a. Hemi chungchangah hian International Trade Initiative Forum (ITIF), Mizoram 29.03.2022 khan Prime Minister Narendra Modi hnenah lehkha leh memorandum an thehlut tawh a. He hmalakna kal zelah vawiin chawhnu khan International Trade Initiative Forum (ITIF), Mizoram chuan Raj Bhavan-ah Governor Hari Babu Kambhampati an kawm a. Governor hnenah hian lehkha an thehluh bakah dan pangai a Zokhawthar Land Custom Station (LCS) kaltlanga ramri insumdawn tawnna a kal thuai theihna turin hma la turin an ngen bawk a ni.

Governor Hari Babu Kambhampati chuan Mizoram chu nakin lawkah sumdawnna hmunpui a ni thuai dawn a; sumdawnna hmunpui ni tur pawhin kawngpui te, Rel kawng te, KMMTTP leh hmasawnna ruhrel lian dang te hmangin Mizoram chu chei mek a ni tih a sawi a. Ramri insumdawnna kawnga mipuite zirtirna kalpui a ITIF Mizoram in hma a la chho chu lawmawm a tih thu a sawi a. Tuna Indo-Myanmar Border trade pangai taka a kal theih loh chhan te lo zirchian a tum thu leh a tul anga hmalak a tum thu a sawi a ni. Governor Hari Babu Kambhampati chuan India sawrkar chuan a thenawm ram nena insumdawn tawn leh inlaichinna tha tak neih chu a duhdan a nih thu a sawi a. India sawrkar chuan ramri insumdawnna chu a ngai pawimawh ngei ngei dawn tih sawiin sumdawng duh tan pawh awlsam taka bul an tan theihna tur( Ease of doing business) thlengin inkaihruaina a siam tha chhunzawm reng a ni a ti.

Zokhawthar Land Custom Station (LCS) chungchang bikah chuan helai hmuna sumdawngte leh ITIF Mizoram te chu in hmuhkhawm thuai se, helai hmuna sumdawnna kalpui harsa an tih chhan te hriat chian ni se, helai hmuna sumdawnna kalpui duh engzah nge awm tih thlengin hriat hmasak ni se tha a tih thu a sawi a. Zokhawthar hmuna sumdawng duh te leh an harsatna chiangkuang zawka hriat a nih hunah Ministry of Commerce leh Central sawrka a thuneitu sang zawk te pawh dawr a tum tih a sawi a ni. Governor chuan Central sawrkar tan pawha rawn thuam chak thuai ngai khawpin sumdawnna lian zawka kalpui tur erawh tan lak a ngai tih a sawi a. Sumdawnna lian tham a awm chuan Chamber of Commerce chak tak a ding anga, Ministry of Commerce pawhin in Chamber of Commerce hnenah thuneihna leh hmalak theihna pawimawh tak tak leh tangkai tak tak a rawn hlan chhawng dawn bawk a ni a ti.

ITIF Mizoram hruaitute hian Governor Hari Babu Kambhampati hnenah hian an hmalk dan te leh tunah an thil buaipui chu Mizoram tan mai ni lo, India ram tana thil pawimawh tak leh chinfel ngai a nih thu te an sawi a. Hemi hnu hian Zokhawthar Land Custom Station (LCS) din a nih dan te, India leh Myanmar insumdawn tawnna chu Zokhawtharah hian bungraw in thleng ang deuhin kum 1995-ah bul tan a nih hnuah kum 2015 December thla khan India sawrkarin ramri insumdawn tawnna pangaiah a hlan chhoh thu te an sawi hmasa a ni. Kum 2015 leh tun inkarah Zokhawtharah hian mumal tak leh dan anga sumdawnna kalpui a nih lo tih an sawi a. Hei hi chhan hrang hrang a awm thu te sawiin helai hmunah hian dan anga sumdawnna kalpui a nih tak loh hnuah sawrkar phalloh thil tawlhnan leh dan kalh a insumdawn tawnna hmun a chang ta nia an hriat thu leh pawi an tih thu an sawi a ni. Zokhawthar Land Custom Station (LCS) in a ken tel tam tak ranrual te hriselna enchain hmaa khung kawmna hmun, eitur thianghlim dan endikna laboratory, weighbridge, warehouse, etc., te a la awm lo tih an sawi a. He Custom Station enkawltu tur thawktu pawh an awm mang loh thu te an sawi a, bungraw inhlan chhawn dawna tangka fai aia hman thin letter of credit, bungraw thawnchhuahna hmun chhinchiahna – Country of Origin Labelling(COOL) leh insumdawn tawnna hmuna mamawh thil pawimawh zual te chungchangah harsatna tam tak a awm a ni an ti. ITIF Mizoram hruaitute chuan helai hmuna insumdawn tawnna atana sawrkarin a tihtur te tih a nih a nih thuai theih nan Governor chu hma lak sak turin an ngen a ni.

Governor nena an inkawmnaah hian ITIF Mizoram aiawh in Pu PC Lawmkunga, IAS(Rtd), President, Pu, Lalthuamliana, Secretary, Pu J.Thattlinga, Member, Pu Rosiama Vanchhawng, IFS(Rtd) leh Pu PL Liandinga, member te an tel a ni.